Një personi i është premtuar një vend punë në Drejtorinë për Transformatorët në varësi të OSHEE-së në këmbim të 2 mijë eurove. Fillimisht për këtë vend pune i është thënë se duhen 4 mijë – 5 mijë euro më pas çmimi ka rënë në 2 mijë euro të cilat çifti i ka marrë personit, por puna në shtet nuk erdhi asnjëherë. Policia ka arrestuar një çift sekserësh, burrë e grua pasi akuzohen për mashtrim.
Të arrestuar janë Ndriçim Safer Jaçelli dhe bashkëshortja Anilda Pavllo Panajoti. Personi që bëri denoncimin është Genti Xhaferi.
Historia
Ne dosjen e prokurorise së Tiranës historia tregohet keshtu: Genti Refik Xhaferi në fillim të vitit 2015, nëpërmjet rrethit shoqëror, në rrethana rastësore ka njohur shtetasin Ndriçim Jaçelli, i cili gjatë kësaj periudhe kohore punonte si inxhinier në Drejtorinë për Transformatorët në varësi të OSHEE-së, me vendndodhje në rrugën “Muhamet Gjollesha”, Tiranë. Sipas kallëzuesit njohja me këtë shtetas ka vijuar me biseda shoqërore dhe marrëdhënia në mes tyre është forcuar edhe më shumë duke krijuar shoqërori me njëri-tjetrin.
Sipas kallëzuesit në shtator 2015 Jaçelli i ka propozuar mundësinë e punësimit në të njejtën drejtori ku ai punonte, pasi sipas këtij të fundit ai kishte marrëdhënie shumë të mira me drejtorin e këtij institucioni, të cilin kallëzuesi e njeh vetëm me emrin “Rudolf”.
Ndriçim Jaçelli, sipas kallëzuesit Xhaferi, i ka thënë se për një vend pune në Drejtorinë ku punonte paguhej një shumë prej 4.000 deri në 5.000 euro, në formë mitdhënieje.
Por, pas disa bisedash të bëra mes tij dhe Ndriçimit për këtë qëllim, ky i fundit i ka thënë se kishte folur me drejtorin dhe ai kishte rënë dakort që për kallëzuesin do të mbaronte punë kundrejt pagesës prej 2.000 euro.
Shtetasi Xhaferi thotë se pasi bisedoi me antarët e tjerë të familjes për këtë mundësi punësimi, ai ka mbajtuar kontakte të vazhdueshme me shtetasin Ndriçim Jaçelli.
Pasi ka mundur të sigurojë shumën e kërkuar prej 2000 euro, më 19 shtator 2015 Xhaferi thotë se është takuar me shtetasin Ndriçim dhe ne dyqanin ku ai tregton celularët dhe në prani edhe të babait të tij shtetasit Refik Xhaferri, i ka dhënë shumën prej 2.000 euro, sëbashku me dokumentat e kërkuara për punësim.
Më pas, në tetor 2015 shtetasi Ndriçim Jaçelli është larguar nga Shqipëria dhe me Xhaferin ka vijuar komunikimi në rrjetin social “Facebook” (një pjesë e këtyre komunikimeve janë vënë në dispozicion) dhe rezulton se shtetasin Ndriçim Jaçelli mundohej të justifikohej në lidhje me premtimin që kishte bërë. Sipas kallëzuesit ky komunikim ka vijuar deri në fillim të vitit 2017, kur shtetasi Jaçelli ka ndërprerë gjithçka.
Sipas kallëzuesit në pamundësi për të komunikuar me shtetasin Ndriçim Jaçelli, ai ka komunikuar disa herë me bashkëshorten e shtetasit Ndriçim, shtetasen Anilda Panajoti si fizikisht ashtu edhe nëpërmjet numrit celular 067……., të cilës i ka shprehur shqetësimin për veprimet e bashkëshortit të saj, biseda disa prej të cilave kallëzuesi i ka regjistruar dhe të vëna në dispozicion.
Shtetasi Xhaferi thotë se Anilda i ka pohuar se dijeninë e bisedave që kishte bërë kallëzuesi me shtetasin Ndriçim dhe meqënëse sipas saj bashkëshorti ndodhej në burg jashtë Shqipërisë ajo ka marrë përsipër të interesohej drejtpërdrejt te drejtori për këtë qëllim.
Sipas kallëzuesit ai ka kontaktuar disa herë me shtetasen Anilda, ku ajo i ka premtuar që do të bisedonte edhe me këshilltaren e Ministrit në lidhje me punën e tij dhe në rast të kundërt do t’i kthente lekët deri në muajin shkurt 2017. Por, sipas kallëzuesit pavarësisht premtimeve të shtetases Anilda Panajoti ai deri më tani nuk ka filluar punë dhe as nuk i janë kthyer paratë nga dy personat e sipërcituar ne kallëzim.
Kallzimi penal pas dy vitesh
Në datë 4 tetor 2017 në Drejtorinë Vendore të Policisë Tiranë, Genti Xhaferri me banim në Shkozë të Tiranës bëri kallëzimin penal
Në 11 tetor 10.2017 Prokuroria pranë Gjykatës së Shkallës së Parë Tiranë, regjistroi procedimin penal nr 8277 të vitit 2017, për veprat penale “Ushtrimi i ndikimit të paligjshëm ndaj personave që ushtrojnë fuksione publike”, parashikuar nga neni 245 të Kodit Penal.
Arrestimi
Gjykata e Tiranës ka dhënë sot arrest me burg për Ndriçim Safer Jaçelli. 60 vjeçari i lindur në Pogradec dhe banues në Tiranë dyshohet për veprën penale “Ushtrimi i ndikimit të paligjshëm ndaj personave që ushtrojnë fuksione publike”, parashikuar nga neni 245/1 paragrafi 2 dhe 25 i Kodit Penal.
Gjykata dha arrest shtëpie për Anilda Pavllo Panajoti, e datëlindjes 21.03.1960, lindur dhe banuese në Tirane, si e dyshuar për veprën penale “Ushtrimi i ndikimit të paligjshëm ndaj personave që ushtrojnë fuksione publike”, parashikuar nga neni 245/1 paragrafi 2 dhe 25 i Kodit Penal.
