Pak ditë më parë Manuel Neuer u pyet nëse mendonte të “varë dorezat në gozhdë”, por 33-vjeçari qeshi dhe tha se nuk e kishte ndër mend ta bënte diçka të tillë.
Gjithsesi te Bayern Munich po përgatiten për të ardhmen sepse kampioni i botës nuk ofron sigurinë e dikurshme dhe mosha e tij po shkon drejt fundit si lojtar profesionist.
Këtë sezon në Gjermani ka spikatur i riu Alexander Nübel, i cili e nisi sezonin si portier i dytë i Schalke 04, por me paraqitjet e tij arriti të ia zërë vendin portierit kapiten, Ralf Fahrmann.
Gjermani 22-vjeçar ka qenë lojtari i vetëm që ka marrë një vëmendje pozitive në sezonin e dështuar të Schalke që ende nuk ka siguruar mbijetesën në Bundesligë.
Klubi nga Gelsenkirchen është në vështirësi sepse kontrata e Nübel skadon më 30 qershor të vitit 2020 dhe nuk ka ndër mend të rinovojë. Ndërkohë që Bayern ka kohë të presë, edhe nëse nuk e merr këtë sezon, atëherë sezonin e ardhshëm e siguron me parametër zero. Për këtë Schalke do të jetë e detyruar ta shesë nëse vetë lojtari nuk ndërron mendje dhe të rinovojë.
