Tridhjetë persona nga Bulqiza janë paraqitur ditën e sotme në spitalin e qytetit me shenja helmimi.
Sipas mjekëve të spitalit, shtetasit dyshohet se janë helmuar nga uji i pijshëm.
Mjeku Shahin Kaja, i cili ishte mjek roje gjatë të shtunës i tha BIRN se rreth 16 nga të sëmurët vinin nga “Qyteti i Vjetër”, ndërsa 4 nga pjesa tjetër e qytetit. Ai tha se nisur nga shpërndarja gjeografike e personave me simtoma helmimi, dyshimet kryesore binin mbi ujin e pishëm.
“Nisur nga ky fakt dhe duke qenë se nuk ka pasur ndonjë dasëm apo ndonjë festë, dyshojmë që helmimi mund të vijë nga uji i pijshëm”, tha Kaja.
“Dhimbje barku, të vjella, si unë më pas goca dhe nusja. Kur shkuam në spital gjetëm edhe shumë të tjerë që po merrnin mjekim me po të njëjtat shqetësime si ne, madje edhe një i afërm i joni. Mendoj se kjo ka ardhur nga uji i pijshëm”, ka thënë një prej qytetarëve.
Personat e helmuar që kanë marrë mjekim në Spitalin e Bulqizës deklarojnë për BIRN se kanë pasur dhimbje barku, të vjella dhe dhimbje koke dhe po ashtu dyshojnë se shkaku është uji i pijshëm.
“Dhimbje barku, të vjella, si unë më pas goca dhe nusja. Kur shkuam në spital gjetëm edhe shumë të tjerë që po merrnin mjekim me po të njëjtat shqetësime si ne, madje edhe një i afërm i joni. Mendoj se kjo ka ardhur nga uji i pijshëm.”, u shpreh për BIRN një qytetar i Lagjes së Vjetër në Bulqizë, i cili kërkoi që të mos i përmendej emri.
Drejtori i Spitalit të Bulqizës, Dr. Hazis Jella i kontaktuar me telefon nga BIRN, konfirmoi se një numër përsonash kishin shkuar në spital: “Me komplikacione të tilla si të vjella dhe dhimbje barku.” Jella megjithatë tha se nuk dihet ende shkaku i helmimit, pasi janë strukurat e Drejtorisë së Shëndetit Publik që përcaktojnë një gjë të tillë.
Ndërkohë doktori tjetër Kaja i tha BIRN se duke u nisur nga shpërndarja gjeografike e të sëmurëve dhe simtomat dyshimet kryesore binim mbi ujin. Kaja tha se fakti që shumica dërrmuese e të sëmurëve vinin nga e njëjta zonë e qytetit dhe se fluksi ishte shtuar, pa pasur ndonjë arsye tjetër krijonte bindjes se kishim helmim nga uji.
Zyrtarët mohojnë problemin
Nga ana tjetër Flamur Meta, drejtor i Shëndetit Publik në Bulqizë tha se ishin duke hetuar rreth shkaqeve, ndërsa i tha BIRN se nuk kishte të dhëna për helmim nga uji. “Ne bëjmë analizat e ujit dhe unë nuk kam pasur ndonjë sinjalizim nga laboratori që analizat e ujit të kenë dalë me probleme në qytet. Unë si drejtues sinjalizohem kur analizat e ujit nuk dalin konformë parametrave, dhe nuk kam pasur një sinjalizim të tillë”, deklaroi Meta për BIRN.
Meta po ashtu tha se mund të ishin virozat e stinës që kishin shkaktuar fluksin në rritje të persona me shqetësime në spitalin e Bulqizës.
Po ashtu edhe Nedion Muça, drejtor i Ndërmarrjes së Ujësjellësit në Bulqizë, mohoi se kishte probleme të ujit, ndërsa tha se analizat e kryera të premten nuk kishin treguar probleme. “Nëse do të kishte pasur ndonjë sinjalizim nga DSHP për prani të ndotjes, nga ana jonë do të kishte pasur ndërhyrje. Kështu që nuk besoj se ka pasur ndonjë helmim nga uji”, u shpreh Muça për BIRN.
Megjithëse u rindërtua në vitin 2013-të rrjeti i furnizimit me ujë në lagjen “Qyteti i Vjetër” në Bulqizë ka vijuar të ketë probleme, ndërsa banorët ankohen për orare mjaft të kufizuara të furnizimit.
Në rrjet ka ndërhyrje të jashtëligjshme, ndërsa një pjesë e depozitave janë lehtësisht të aksesueshme nga personat e jashtëm dhe janë të ekspozuara ndaj ndotjes.
