Primera Division 2016-2017 merr formë. Në Spanjë ështe hedhur shorti i sezonit të ri ku padyshim, vëmendja më e madhe shkon për datën e dy sfidave “El Clasico” që cilësohen edhe si maksimumi i futbollit spanjoll dhe jo vetëm. Takimi i parë mes dy gjigantëve do të zhvillohet në datën 3 dhjetor në “Camp Nou” për javën e 14 të Primera Division, ndërsa ai i kthimit në 23 prill për javën e 33. Një tjetër përballje e nxehtë do të jetë edhe ajo mes kampionëve dhe Atletico Madrid në 21 shtator në “Camp Nou” dhe sfida e kthimit do të luhet në 24 shkurt.
Përsa i përket ndeshjeve derbi, Reali dhe Atletico kryqëzohen në 20 nëntor dhe 9 prill. La Liga 2016-2017 starton zyrtarisht në datën 21 gusht me ndeshjet e javës së parë, ku Barcelona pret në Katalonjë Real Betis, Atletico Madrid luan përballë debutuesve të Alaves, ndërsa Real Madrid udhëton në transfertën e Real Sociedad. Në total javët janë 38 dhe kampionati spanjoll do të mbyllet zyrtarisht në datën 21 maj të vitit 2017. Primera Division premton një sezon plot surpriza dhe spektakël.
