Me kërkesë të Prokurorisë, Gjykata ka pranuar bllokimin e llogarive bankare të shtetasit anglez, Cenneth Gold i datëlindjes 2 maj 1958. Në vendimin e sekuestrimit të 2 milionë eurove, thuhet se shtetasi anglez rezulton i dënuar nga autoritetet e vendit të tij kohë më parë për akuzën e “mashtrimit” dhe “pastrimt të parave”. Për shkak të kaluarës së tij kriminale dhe transaksioneve të dyshimta, të shumës prej 2 mln euro, Drejtoria e Parandalimit të Pastrimit të Parave në Policinë e Shtetit, ka referuar materialin hetimor në Prokurori. Ku nga verifikimet e kryera dyshohet se shtetasi Cenneth Gold ka sjellë në Shqipëri 2 mln euro nga llogari bankare të vendeve të njohura si offshore, vetëm me qëllim fshehjen e origjinës së tyre.
Në vendim, thuhet se shtetasi anglez ka ardhur në Shqipëri vetëm njëherë, ku ka hapur një llogari bankare në emër të kompanisë “Cashrich Limited” e regjistruar në vendet e njohura si parajsa fiskale. Pak kohë më pas, në llogari të kësaj kompanie janë transferuar 2 mln euro. Kjo shumë, thuhet në dosje, fillimisht është dërguar nga Anglia në Maltë, më pas në Gjibraltar, Qipro, në Turqi dhe më pas janë transferuar në Shqipëri, duke justifikuar me disa fatura që dyshohet se janë fiktive.
Nga Shqipëria, është tentuar që po kjo shumë të kthehet në Maltë, por që janë bllokuar. Këto lëvizje bankare, sipas akuzës, dyshohet se bëhen për të pastruar paratë e paligjshme, duke i kaluar nga bankat e vendeve të njohura si parajsa fiskale në një bankë të nivelit të dytë në Shqipëri, për të justifikuar më pas origjinën e tyre. Në vendimin e sekuestirmit, thuhet se kompania “Cashrich Limited” e regjistruar në një nga vendet offshore nuk ka aktivitet në Shqipëri dhe rezulton se është hapur vetëm llogaria bankare në emër të kompanisë dhe nuk është kryer asnjë procedurë për hapjen e shoqërisë në Qendrën e Regjistrimit të Bizneseve këtu në Tiranë. Duke ngrityr kështu dyshimet, se origjina e parave është e paligjshme. Për rastin në fjalë, veç sekuestrimit, Prokuroria ka nisur edhe hetimet penale ndaj shtetasit anglez Cenneth Gold për akuzën e “pastrimit të parave” në bashkëpunim.
