Mjaftoi vetëm një vit, që Julian Draxler të pendohej për vendimin që preferoi të transferohej te Wolfsburg dhe jo te Juventusi. Tashmë duket se mesfushori gjerman po i shtrin dorën bardhezinjve, të cilët mund të provojnë ta blejnë, pasi e ndoqën për shumë kohë gjatë merkatos së kaluar.
“Dëshiroj të largohem nga Wolfsburg. Ky është objektivi im. Pak ditë përpara gjysmëfinales së Europianit me Francën njoftova edhe drejtuesit e klubit”, tha 22-vjeçari për gazetën “Bild”.
Sipas Draxler “vullneti i tij është i qartë dhe në momentin kur mund të paraqiten klube të interesuar, palët të ulen dhe të diskutojnë”. Ndoshta një mesazh për Juventusin, që mund të mendojë të rikthehet në garën për futbollistin.
Aktualisht kampionët e Italisë janë në negociata me klubin e Bundesligës për Luiz Gustavo-n. Braziliani është në listën e Marotta-s, për të përforcuar mesfushën, në rast të largimit të Pogba dhe që duhet të presë ende për rikthimin e Marchisio-s.
Juventusi synon ta huazojë lojtarin, por kjo formulë nuk preferohet nga gjermanët. Në negociata mund të përfshihet edhe Simone Zaza, gjithmonë nëse sulmuesi do të bindet të luajë në Bundesligë. Por, pas fjalëve të Draxler, në merkaton e bardhezinjve hapen skenarë të rinj, duke i shtuar merkatos së “Zonjës së Vjetër” një tjetër kandidat në listën e dëshirave.
