Kryetarja e LSI, Monika Kryemadhi ka reaguar në prag të zhvillimit të takimit të radhës së vendeve të atij që po njihet si Mini-Shengeni Ballkanik.
Me anë të një postimi në rrjetet sociale, Kryemadhi e quan një iniciativë të nxituar pa Kosovën dhe vendet e tjera të Ballkanit Perëndimor dhe që nxit konflikt dhe lë shumë dritëhije pas.
Kryemadhi thotë se ky proces ka nevojë urgjente për transparencë, pasi të gjithë duan të dinë se çfarë është diskutuar, pikat e bashkëpunimit, pse refuzohet nga shtetet e tjera dhe çfarë përfiton dhe çfarë humbet Shqipëria?
Postimi i plotë
Mini Schengeni Ballkanik pa Kosovën dhe vendet e tjera të Ballkanit Perëndimor është jo vetëm një iniciativë e nxituar, por ajo nxit konflikt dhe lë shumë dritëhije pas. Këtë e konfirmoi edhe ambasadori Grenell pak kohë më parë kur theksoi se “ Ne besojmë se që kjo nismë të jetë e suksesshme, ajo duhet të përfshijë të gjithë në rajon, përfshirë qeverinë e Kosovës”.
LSI është në mbështetje të çdo marrëveshjeje dhe bashkëpunimi që sjell stabilitet dhe rritje ekonomike, por që ky të jetë një proces i besueshëm ka nevojë emergjente për transparencë. Sot të gjithë ne kërkojmë të dimë:
- Çfarë është diskutuar mbi këtë marrëveshje?
2. Cilat janë pikat e bashkëpunimit për të cilat është rënë dakord?
3. Përse Kosova, Mali i Zi dhe Bosnja kanë refuzuar të jenë pjesë?
4. Çfarë përfiton dhe çfarë humbet Shqipëria?
5. A garantohet njohja e Kosovës nëpërmjet këtij bashkëpunimi?
6. Çfarë e detyroi Kryeministrin të vraponte drejt kësaj iniciative duke mos marrë parasysh Kosovën?
Nëse Mini Schengeni po përdoret nga Edi Rama për presion ndaj BE, ai duhet ta di mirë se perspektiva evropiane e Shqipërisë është e pazëvendësueshme. Kushtet e Bundestagut janë i vetmi udhërrëfyes që kanë qytetarët shqiptarë. Çdo shfaqje dhe propagandë tjetër vetëm dëmton rrugëtimin evropian të vendit!
