Basha me biznesin në Sauk: Ka një rritje dramatike të ryshfetit, i paralajmëroj ata se asgjë nuk do të harrohet dhe nuk do të falet!

Kreu i opozitës, Lulzim Basha ka nisur takime sot me biznesmenët e vegjël në Sauk. Basha ka takuar fillimisht dy vëllezër që kanë një gomisteri.

Basha tha se, probleme të ngjashme nga kriza kanë sipërmarrësit edhe kudo në Shqipëri.

“Problem është rënia në pikiatë e konsumit, e fuqisë blerëse. Problem numër dy është se qeveria vazhdon me bandat e tatimorëve për të mbushur xhepat e tyre dhe bosët e tyre të korruptuar. Më është raportuar së fundmi, një rritje dramatike e ryshfetit. Por, i bëj një paralajmërim atyre që asgjë nuk do të harrohet dhe asgjë nuk do të falet. Kjo është sjellje tipike e një qeverie, e një administrate në ikje”, u shpreh Basha.