Dhjetëra tregtarë kanë protestuar mëngjesin e djeshëm para Bashkisë së Durrësit, duke kërkuar shmangien e konkurencës së pandershme dhe heqjen e gjobave të Tatimorëve. Tregtarët thonë se, inspektorët e Tatimeve i kanë penalizuar, pasi nuk kanë kasë, por ata theksojnë se nuk janë biznes i vogël, por ambulant që paguajnë taksa në Bashki. Mbi 1200 tregtarë të tregut industrial dhe atij të rrobave të përdorura në Durrës, kanë protestuar për rreth një orë mëngjesin e kësaj të mërkure. Tregtarët thonë se prej 3 ditësh janë bërë objekt i një kontrolli tatimor “blic” nga Tirana dhe u janë vendosur gjoba të kripura nga inspektorët. Sipas tyre, tatimorët u kanë kërkuar vendosjen e kasës fiskale, por ata thonë se nuk mund të licencohen si biznes i vogël, pasi të ardhurat janë të pamjaftueshme. “Ditë për ditë po vjen hetimi tatimor i Tiranës dhe ka vënë mbi 50 e ca gjoba që kalojnë mbi 50 mijë lekë të reja. Paguajmë vetëm 6000 mijë lekë të reja që kemi detyrimin vjetor me Bashkinë dhe vetëm sigurimet shëndetësore dhe shoqërore dhe nuk e kuptoj, tani këtu vihet e luftohet që të vihet kasë”, thonë tregtarët. “Po vendosin gjoba të fshehta. Vinë vendosin tre gjoba në javë, vinë javën tjetër dhe vendosin tre gjoba të tjera, nuk është e drejtë. Njerëzit po luftojnë për bukë, për mbijetesë”, shprehen tregtarët. Një tjetër shqetësim që ngrenë tregtarët është konkurrenca e paligjshme. Ata akuzojnë Bashkinë dhe Policinë Bashkiake që lejon ambulantët e palicencuar të tregtojnë në trotuar apo në rrugë. “Na kujtojnë ato vitet e emigrimit, kur na ndiqte policia greke dhe futeshim në ferra. Dhe këtu kështu, kur vinë tatim-taksat o burra kush të ulë qepenat, shprehet një tregtar. “Do të dalim të bllokojmë rrugën fare tek tregu nëse vinë tatim-taksat, nuk ka rrugë tjetër, do ta bëjmë me dhunë tani këtë punë”, thotë një tregtar tjetër. “Punojmë, ditë-ditë kthehemi në shtëpi bosh, ditë-ditë punojmë. Ata kërkojnë fatura, ne dhe tregu atje në Tiranë nuk na jep fatura fare”, u shpreh tregtari. Tregtarët e tregut industrial të Durrësit thonë se, xhiroja ditore ka rënë aq shumë, sa shpesh nuk arrijnë të shesin asnjë produkt.
