Kreu i PD, Basha reagoi dje pas show-t mediatik të Ramës e Tahirit në lidhje me Policinë e Shtetit si dhe deklaratave të tyre se opozita sulmon policinë. Përmes një reagimi në rrjetin social Facebook, Basha deklaron se Rama ka tre vite që drejton vendin me krimin e ka tradhëtuar policinë për pazaret me krimin.
“Nuk ka pasur kohë më të vështirë për policinë se këto 3 vite, kur duhej të bënte kujdes të mos i dilte para Emiliano Shullazit, të mos i prishte punë Balilajt, të mos pengonte Habilajt, t’i hapte rrugën vrasësve me pagesë që pret Tahiri në zyrë, të mbyllte sytë kur arratisej Frroku që vrau komisarin Lamaj, të nderonte Rroshin e Bushin, të ishte në shërbim të Ndokës e t’i thonte “po shef” shumë banditëve, trafikantëve, vrasësve, të gjithë miq të Edi Ramës.
Kur pranoi sot se ka policë që duhet të ishin në burg, nuk e tha pse nuk janë në burg: sepse i duhen për të ruajtur drogën e miqve të tij. Prandaj i mori nga burgu ata që policët e ndershëm i kishin futur aty, dhe jua vuri mbi kokë si “shefa”.
Rama tradhëtoi policinë për pazaret e tij me krimin. Opozita ka 3 vite që lufton me krimin, ndërsa Edi Rama ka 3 vite që drejton vendin me krimin. Policia, rendi dhe siguria do të jenë më mirë pa Edi Ramën”, shprehet Basha në reagimin e tij.
