Talebanët kanë shpallur një amnisti të përgjithshme për të gjithë zyrtarët qeveritarë, duke u kërkuar atyre të kthehen në punë me “besim të plotë”.
“Një amnisti e përgjithshme është shpallur për të gjithë … kështu që ju duhet të filloni jetën tuaj rutinë me besim të plotë” tha AFP, duke cituar një deklaratë talebane.
Ajo vjen mes një sfondi frike në Afganistan, pasi ato që punonin për qeverinë ose organizatat e mbështetura nga Perëndimi – ata që punuan si përkthyes për trupat amerikane për shembull, kanë frikë nga ndëshkimet.
Talebanët janë të njohur për kryerjen e dënimeve brutale dhe janë akuzuar për kryerjen e krimeve të luftës, diçka që ata e mohojnë.
Nga ana tjetër fluturimet ushtarake që evakuojnë diplomatët dhe civilët kanë rifilluar në aeroportin ndërkombëtar të Kabulit – vetëm një ditë pas skenave kaotike në aeroport.
Të hënën, dhjetëra mijëra afganë u fotografuan duke u përpjekur të iknin, duke u varur dëshpërimisht në aeroplanët që fluturonin jashtë kryeqytetit. Pesë persona thuhet se u vranë, megjithëse nuk është e qartë nëse ata u qëlluan ose u shtypën nga rrëmuja.
Sot, megjithatë, zyrtarët thonë se është një skenë shumë më e qetë. “Shumë njerëz që ishin këtu dje kanë shkuar në shtëpi,” tha një zyrtar i sigurisë perëndimore për Reuters.
Sidoqoftë, Reuters citon dëshmitarë që thonë se të shtëna të herëpashershme ende mund të dëgjohen nga drejtimi i aeroportit. Fluturimet u pezulluan për pjesën më të madhe të së hënës.
Aeroporti është aktualisht pika e vetme e daljes e hapur për forcat perëndimore nga Afganistani.
Ndërkohë Presidenti Biden ka premtuar 500 milionë dollarë ndihmë për refugjatët afganë.
Në një deklaratë mbrëmjen e djeshme nga Shtëpia e Bardhë Biden tha se po sanksiononte përdorimin e një fondi amerikan për refugjatë “me qëllim të përmbushjes së nevojave urgjente të papritura të refugjatëve dhe migrimit të refugjatëve, viktimave të konfliktit dhe personave të tjerë në rrezik si rezultat i situatës në Afganistan”.
Deklarata shtoi se paratë mund të përdoren përmes organizatave ndërkombëtare dhe bamirësive, si dhe departamenteve dhe agjencive qeveritare.
Ky veprim vjen vetëm disa orë pasi Presidenti Biden mbrojti fuqishëm vendimin e tij për të tërhequr trupat amerikane nga Afganistani.
Ai këmbënguli se nëse nuk do të kishte respektuar një marrëveshje largimi të negociuar nga administrata e mëparshme e Donald Trump, SHBA rrezikonte një kthim në konflikt të hapur me forcat talebane.
Por ai e bëri të qartë se çdo sulm ndaj personelit amerikan të përfshirë në operacionin e tërheqjes do të pritej me forcë shkatërruese nëse është e nevojshme.
