Mbi 10 tonë hashash dhe mbi 55 mijë rrënjë kanabis sativa janë bllokuar nga policia shqiptare vetëm muajin e fundit gjatë operacioneve të organizuara nga Prokuroria dhe SHISH, sipas shifrave të publikuara nga vetë policia, por në fakt sasia e drogës së bllokuar ka qenë edhe më e lartë. Ndërsa nga policia italiane dhe ajo greke janë sekuestruar 11 tonë drogë brenda një muaji. Vetëm 27 ditë nga deklarata e policisë kur tha se, ka asgjësuar mbi 99% të parcelave të mbjella me hashash, është vetë Policia e Shtetit që ka shpërndarë shifra alarmante të sasive të bllokuara.
Përllogaritja e lëndës narkotike të bllokuar është bërë për periudhën 7 tetor deri 3 nëntor të këtij viti, në bazë të komunikatave që ka shpërndarë vetë Policia e Shtetit për mediat. Sipas këtyre të dhënave, vetëm gjatë 27 ditëve, vetë Policia e Shtetit ka bllokuar 10.5 tonë hashash të tharë, si dhe rreth 55 mijë rrënjë të bimës narkotike kanabis sativa, të mbjella ose në proces tharjeje.
Këto statistika, tregojnë edhe një herë se Policia e Shtetit nuk ka asgjësuar të gjitha parcelat e mbjella në Shqipëri, siç u pretendua në konferencën për media bashkë me Guardia di Financën. Arsyeja e shpërndarjes në media, të një statistike të tillë, mbetet për t’u parë pasi ditët në vazhdim po tregojnë se jo vetëm që nuk janë asgjësuar të gjitha parcelat, por ka zona të caktuara, të cilat vazhdojnë të punojnë të pashqetësuara nga Policia e Shtetit.
Të pyetur për ndonjë koment apo për statistikat e përllogaritura, zyrtarisht Policia e Shtetit pranon këto shifra duke pretenduar se çdo ditë po punohet për të shkatërruar apo sekuestruar çdo bimë narkotike që është kultivuar në Shqipëri.
7 tonë hashash në Itali
Tek shifra 10.5 tonë kanabis e publikuar nga policia shqiptare, e cila çdo ditë po ndryshon, nuk janë përfshirë ato rastet kur media italiane ka njoftuar për bllokimin e mjeteve të lundrimit të mbushura me hashash. Vetë policia, brenda 27 ditëve ka njoftuar se ka bashkëpunuar me policinë italiane në dy raste, ku janë bllokuar në Itali tonelata hashashi. Nga përllogaritja e sasive të publikuara nga mediat italiane, kjo shifër kap rreth 7 tonë hashash që kanë arritur të kalojnë drejt brigjeve italiane.
Sipas zyrtarëve të policisë italiane, vetëm 10% e sasisë së drogave që futen në Itali arrihet të kapet dhe bllokohet, ndërsa 90% e rasteve gomonet dhe mjetet e tjera arrijnë të transportjnë drogë në Itali. Sipas kësaj deklarate sasia e kultivuar dhe e pakapur apo asgjësuar duhet të jetë shumë më e madhe.
Dy ditë më parë policia italiane sekuestroi në Bari 1 ton kanabis nga Shqipëria. Mediat italiane shkruajnë se është sekuestruar 1 ton marijuanë, 15 kg kokainë, si dhe një arsenal armësh, mitralozë, pistoleta silenciatorë e municione. Hetimet e zhvilluara që në vitin 2015, shkruan gazeta “La Repubblica”, kanë dokumentuar importin e sasive të mëdha të hashashit nga Shqipëria. Në kuadër të këtij hetimi, autoritetet italiane njoftojnë se janë gjetur dhe sekuestruar më shumë se 3.500 armë në vitin 2014. Tri klane të ndryshme kanë importuar tonelata me hashash nga Shqipëria, shkruan “Ansa”.
Hetimi i koordinuar nga prokurori i DDA në Bari, Giuseppe Maralfa, ka dokumentuar importimin e sasive të mëdha të kokainës dhe marijuanës nga Shqipëria në Romë, Milano dhe Palermo.
4 tonë në Greqi
Edhe policia greke ka bllokuar tonelata droge nga Shqipëria. Brenda një muaji janë sekuestruar më shumë se 4 tonë kanabis. Vetëm më datën 20 tetor, policia greke sekuestroi 1.7 tonë kanabis. Mediat greke raportuan se 1 ton e 669 kg marijuanë ka sekuestruar policia greke gjatë një operacioni antidrogë më 20 tetor në qytezën Afidnes, në rrethinat e Athinës. Droga ishte magazinuar aty dhe po paketohej me qëllim që të dërgohej në Holandë, Gjermani dhe Belgjikë. Marijuana e sekuestruar vinte nga Shqipëria dhe 6 persona përfunduan në pranga, disa prej tyre shqiptarë.
Mediat greke shkruanin se, ngarkesa prej 1.7 tonë drogë e kapur në afërsi të Athinës është trafikuar nga Klement Balili. Një nga gazetat më të mëdha në Greqi, “Ethnos”, shkruante se, “pas dërgimit në Greqi të ngarkesës prej 1 ton kanabis, është një rrjet ndërkombëtar i trafikut të drogës, i lidhur me 44-vjeçarin shqiptar, Klement Balili, që njihet edhe si ‘Eskobari’ i Ballkanit”.
Gjatë muajit tetor janë kapur edhe disa ngarkesa të tjera droge nga 180, 330, 500 dhe 600 kg kanabis, si dhe ngarkesa të vogla që transportoheshin me makina nëpërmjet kufirit shqiptar.
Ndërkohë ditën e djeshme një trafikant shqiptar hapi zjarr ndaj policisë greke, pasi i bllokoi 100 kg kanabis që ai kishte futur nëpërmjet kufirit shqiptar.
R.POLISI
