Mes viktimave ishin edhe nëna dhe motra e nuses dhe një nga të ftuarit në festë
Një ish-rojtar pylli vrau gruan me të cilën sapo ishte martuar dhe tre persona të tjerë gjatë dasmës së tij. Më pas burri vuri armën në kokë dhe i mori jetën vetes. Vrasjet dhe vetëvrasja, siç raportohet sot nga Bangkok Post, ka ndodhur në Tajlandë, në fshatin Wang Nam Khieo, në provincën rurale të Nakhon Ratchasima.
Dhëndri, Chaturong Suksuk, 29 vjeç, mungoi për pak kohë në dasmë. Ai u kthye i armatosur dhe hapi zjarr rreth orës 23:30 me orën lokale, duke vrarë gruan e tij Kanchana Pachunthuek (44 vjeçe), me të cilën kishte jetuar së bashku për tre vjet, nënën dhe motrën e saj dhe një burrë që ishte në mesin e të ftuarve. Një tjetër mysafir ka mbetur i plagosur dhe ndodhet në gjendje të rëndë.
Nuk dihen arsyet e veprimit të tij. Dasma nisi me një rit budist në mëngjes dhe pjesa tjetër e ditës kaloi në një atmosferë festive. Burri kishte punuar më parë si rojtar pylli dhe ishte bërë invalid pasi kishte plagosur këmbën gjatë detyrës.
