Lidhur me ndryshimet në qeveri dhe krijimin e një ministrie të re, ku do të ketë në përbërje, veç ekonomisë dhe inovacionit, edhe kulturën, ka reaguar në një postim në profilin e saj në rrjetin social facebook, anëtarja e kryesisë së PD-së, Taulanda Jupi.
Për Jupin, kultura sot është “kurbani” i radhës i Edi Ramës.
“Kultura është sot kurbani i radhës i Edi Ramës. Vendimi për të bashkuar nën të njëjtën varësi Ministrinë e Kulturës, Ekonomisë dhe Inovacionit është një vendim absurd, i pakonsultuar i cili dëmton rëndë jo vetëm pavarësinë institucionale por centralizon edhe më tej venddimarrjen për kulturën, artin dhe trashëgimin e kulturës duke dëmtuar zhvillimin e të gjithë spektrit të industrisë kreative.” -shkruan Jupi.
“Edhe pse në mandatin e 3-të qeverisës, – vijon më tej zyrtarja demokrate, – përtej premtimeve për një “Ligj të ri për artin, kulturën dhe krijimtarinë”, Edi Rama dhe ekipi i tij, nuk arriti të hartojë dhe miratojë asnjë paketë ligjore që mbron dhe standartizon të drejtat e individit krijues, asnjë ligj për krijimtarinë, nxitësit fiskalë apo hallka të tjera që do të çlironin këtë sektor nga centralizimi, për të dhënë mundësi punësimi për artistët, krijuesit dhe punonjësit e tjerë në fushat e artit dhe krijimtarisë.”
Zonja Jupi përfundon reagimin e saj, duke thëmë se “Edi Rama pas këtij akti, do të kujtohet si artisti që pati çdo mundësi, por nuk bëri dot një program vizionar për kulturën dhe artin në Shqipëri”.
