Zyra e Organizatës Botërore të Shëndetësisë (OBSH) për Evropën paralajmëroi se ka pasur 30 herë më shumë raste të fruthit në dhjetë muajt e parë të 2023 sesa një vit më parë dhe u bëri thirrje vendeve që të kryejnë urgjentisht fushata vaksinimi.
OBSH beson se rishfaqja e virusit shumë ngjitës të fruthit është e lidhur me uljen e shkallës së vaksinimit. Virusi shkakton ethe, kollë dhe në raste të rralla pneumoni, inflamacion të trurit dhe vdekje.
OBSH kishte regjistruar më shumë se 30,000 raste të fruthit në Evropë midis janarit dhe tetorit 2023 krahasuar me 941 raste në vitin 2022. Sipas OBSH-së, rastet janë shtuar muajt e fundit dhe pritet të vazhdojnë nëse nuk merren masa të menjëhershme.
Drejtori Rajonal i OBSH-së për Evropën, Hans Kluge, theksoi urgjencën e vaksinimit për të ndaluar përhapjen e fruthit dhe për të parandaluar përhapjen e tij të mëtejshme.
Ai vuri në dukje se është e rëndësishme që të gjitha vendet të jenë të përgatitura për të identifikuar dhe reaguar me shpejtësi ndaj rasteve të fruthit, pasi ato kërcënojnë progresin që është bërë drejt eliminimit të fruthit.
OBSH ka raportuar se për shkak të pandemisë Covid-19, imunizimi rutinë i fëmijërisë është pezulluar nga viti 2020 deri në vitin 2022. Si rezultat, më shumë se 1.8 milionë foshnja nuk u vaksinuan kundër fruthit gjatë kësaj periudhe, duke theksuar se rastet e fruthit ishin të regjistruara në vendet ku sëmundja ishte shpallur zyrtarisht e eliminuar, tha OBSH.
Për shembull, javën e kaluar Agjencia e Sigurisë Shëndetësore e Mbretërisë së Bashkuar (UKHSA) shpalli një emergjencë kombëtare shëndetësore për shkak të rritjes së rasteve të fruthit në të gjithë vendin.
