Pas marrjes së kryebashkiakut të Libohovës i pandehur nga SPAK, ka reaguar nëpërmjet një postimi në profilin e tij në rrjetin social facebook, anëtari i kryesisë së PD-së, Myzafer Elezi.
“Siç po provohet, të përzgjedhurit e kësaj qeverie për poste zyrtare jo rastësisht janë persona me të shkuar ‘të errët’. Janë të shumtë ata që kanë probleme të pazgjidhura me drejtësinë dhe tashmë një nga një po shkojnë në SPAK të përballen me akuzat e ngritura ndaj tyre. Po të bësh një rezyme të listës së kryebashkiakëve të maxhorancës aktuale vërehen emra “të fortësh” që në CV-në e tyre kanë vendime dënimi në periudha kohore të ndryshme.” – shkruan Elezi në facebook.
Më tej ai thotë se ka ardhur koha për Veting në politikë për të shmangur kandidimin e personave me precedent penal, edhe pse, sipas tij, Rilindja nuk e pranon një gjë të tillë, sepse ajo tek bashkëpunimi me njerëz të tillë, e ka sekretin e fitores.
“Në situatën aktuale, miratimi i “Vettingut në Politikë” është domosdoshmëri e kohës për të shmangur çdo mundësi që personat me precedentë kriminal të zgjidhen në funksione publike. Por, “Rilindja” nuk e pranon vetting-un e politikanëve, madje shkon edhe më tej, të zbus dhe ligjin për dekriminalizimin, me qëllim amnistinë e personave me precedentë penalë dhe kandidimin e tyre që ligji aktual i pengon.” – vijon më tej ai.
Më poshtë postimi i plotë:
Kryebashkiaku i Libohovës merret ‘i pandehur’ nga SPAK për favorizim të kultivimit të kanabisit gjatë kohës që ishte në strukturat e Policisë së Shtetit.
Siç po provohet, të përzgjedhurit e kësaj qeverie për poste zyrtare jo rastësisht janë persona me të shkuar ‘të errët’.
Janë të shumtë ata që kanë probleme të pazgjidhura me drejtësinë dhe tashmë një nga një po shkojnë në SPAK të përballen me akuzat e ngritura ndaj tyre.
Po të bësh një rezyme të listës së kryebashkiakëve të maxhorancës aktuale vërehen emra “të fortësh” që në CV-në e tyre kanë vendime dënimi në periudha kohore të ndryshme.
Ata, ose kanë qenë të dënuar brenda apo jashtë vendit për vepra të ndryshme penale, ose “kanë ngrënë dardha” pas kurrizit të Kryetarit të tyre gjatë ushtrimit të funksionit publik.
Vetëm brenda një jave dy funksionar vendor merren nën hetim nga SPAK. Prefektja e Fierit u shkarkua nga detyra pasi “kishte ngrënë dardha pas shpinës së kryeministrit” gjatë periudhës që ishte në funksionin e kryetarit të bashkisë Patos.
Po kështu edhe kryetari në detyrë i bashkisë Libohovë.
Koha tregoi se draft-ligji ‘Vetting për Politikanët’ i propozuar nga Lulzim Basha dhe Partia Demokratike, në kuadër të reformës zgjedhore janë e vetmja zgjidhje për pastrimin e politikës nga të korruptuarit dhe personat me lidhje kriminale.
Në situatën aktuale, miratimi i “Vettingut në Politikë” është domosdoshmëri e kohës për të shmangur çdo mundësi që personat me precedentë kriminal të zgjidhen në funksione publike.
Por, “Rilindja” nuk e pranon vetting-un e politikanëve, madje shkon edhe më tej, të zbus dhe ligjin për dekriminalizimin, me qëllim amnistinë e personave me precedentë penalë dhe kandidimin e tyre që ligji aktual i pengon.
Kjo tregon se qeveria aktuale vetëm në aleancë me krimin e organizuar mund të shkaktojë ‘tërmet’. Ajo e ka të pamundur të fitojë pa angazhuar “çunat problematikë” dhe pa i përfshirë ata në lista.
Me shumë gjasa, nëse SPAK vazhdon punën me kurajë dhe guxim, mbështetur në prova dhe në ligj, pavarësisht presionit politik të ushtruar nga “hallexhinjtë” e politikës së vjetër, një grup parlamentar dhe një kolegj i kryetarëve të pushtetit lokal do të formohen te 313-ta.
