Ligji historik i Bashkimit Evropian për inteligjencën artificiale, i cili synon të rregullojë mënyrën se si kompanitë zhvillojnë, përdorin dhe zbatojnë AI, hyn zyrtarisht në fuqi sot (1 gusht).
Akti i AI u propozua për herë të parë nga Komisioni Evropian në vitin 2020 dhe synon të adresojë efektet negative të inteligjencës artificiale. Ai mori miratimin përfundimtar nga shtetet anëtare, eurodeputetët dhe Komisioni Evropian majin e kaluar.
Ligji synon kryesisht kompanitë e mëdha amerikane të teknologjisë, të cilat aktualisht janë prodhuesit kryesorë të sistemeve të avancuara të inteligjencës artificiale. Megjithatë, shumë biznese të tjera do të bien brenda fushëveprimit të rregullave – madje edhe biznese jo teknologjike.
Rregullorja vendos një kuadër rregullator gjithëpërfshirës dhe të harmonizuar për AI në të gjithë BE-në, duke aplikuar një qasje për rregullimin e kësaj teknologjie.
Qëllimi i legjislacionit të ri, sipas një njoftimi të Parlamentit Evropian, është të mbrojë të drejtat themelore, demokracinë, sundimin e ligjit dhe qëndrueshmërinë mjedisore nga sistemet e inteligjencës artificiale me rrezik të lartë, por edhe të forcojë në të njëjtën kohë inovacionin dhe të nxjerrë në pah Evropën si forcë pioniere në këtë fushë.
Për këtë qëllim, rregullorja përcakton detyrime të ndryshme për sistemet e inteligjencës artificiale, në varësi të rreziqeve dhe ndikimeve të mundshme të përdorimit të tyre.
Shembuj të sistemeve të inteligjencës artificiale me rrezik të lartë përfshijnë automjetet autonome, pajisjet mjekësore, sistemet e vendimmarrjes për kredinë, vlerësimin arsimor dhe sistemet e identifikimit biometrik në distancë.
Ligji vendos gjithashtu një ndalim të plotë për çdo aplikim të AI që konsiderohet “i papranueshëm” për sa i përket nivelit të rrezikut.
