E Ngarkuara me Punë e SHBA-ve, Nancy VanHorn, ka zhvilluar një takim ditën e sotme (28 gusht) me kreun e SPAK-ut, Altin Dumani, në ambientet e Prokurorisë së Posaçme.
Pjesë e këtij takimi u bë dhe Drejtuesi i Seksionit Kundër Korrupsionit të SPAK-ut, Klodjan Braho.
Përmes një postimi në rrjete sociale, Ambasada e Shteteve të Bashkuara në Shqipëri ka ndarë pak nga takimi i tyre.
Sipas institucionit, VanHorn ka mbështetur punën e bërë nga Prokuroria e Posaçme përsa i përket luftës anti-korrupsion.
“Znj. VanHorn shprehu admirimin e Shteteve të Bashkuara për përpjekjet e palodhura të SPAK-ut dhe i nxiti ata të vazhdojnë punën e tyre të guximshme dhe të udhëhequr nga integriteti.”, shkruan ambasada amerikane në Shqipëri.
Po kështu, VanHorn është shprehur se SPAK dhe institucionet e tjera të pavarura kanë mbështetjen e plotë nga SHBA-të për të përmbushur misionin e tyre, si një alternativë që “shtron rrugën” e anëtarësimit të vendit në Bashkimin Evropian.
“E Ngarkuara me Punë Nancy VanHorn u takua sot me Drejtuesin e SPAK-ut Altin Dumani dhe Drejtuesin e Seksionit Kundër Korrupsionit në SPAK, Klodjan Braho, të cilët janë të përkushtuar në luftën kundër krimit të organizuar, korrupsionit dhe pandëshkueshmërisë në Shqipëri. Znj. VanHorn shprehu admirimin e Shteteve të Bashkuara për përpjekjet e palodhura të SPAK-ut dhe i nxiti ata të vazhdojnë punën e tyre të guximshme dhe të udhëhequr nga integriteti. Ajo theksoi se SPAK dhe institucionet e pavarura të Shqipërisë kanë mbështetjen e plotë të Shteteve të Bashkuara në misionin e tyre për popullin shqiptar, duke shtruar rrugën e Shqipërisë drejt anëtarësimit në BE”, shkroi ambasada e SHBA në Facebook
