Një tjetër pistë në horizont për Rey Manajn. Pak ditë më parë mediat italiane identifikuan Las Palmas në La Liga si destinacionin më të mundshëm për sulmuesin e kombëtares, ndërsa tani Gianluca di Marzio, gazetari i njohur italian i mirinformuar në lidhje me çështjet e merkatos, shkruan se e ardhmja e 19-vjeçarit mund të jetë edhe në Bundesliga. Në faqen e tij në web Di Marzio bën të ditur se për Manajn po interesohet Ingolstad, skuadër që aktualisht ndodhet në vendin e parafundit të Bundesligës dhe synon të sigurojë mbijetesën. Sulmuesi, kartoni i të cilit është në pronësi të Interit, gjatë fazës së parë shënoi dy gola në Serinë A pasi u aktivizua në 12 ndeshje, vetëm në katër prej tyre si titullar, nën urdhrat e Massimo Oddos dhe tanimë është në kërkim të një destinacioni të ri ku mund të aktivizohet më në vazhdimësi për të shfaqur vlerat e tij. Ingolstad së shpejti mund të bëjë një ofertë zyrtare për Manajn, i cili bashkë me agjentin e tij, ish-portierin e mirënjohur Jimmy Fontana, ju duhet të vlerësojnë me kujdes alternativat për të gjetur zgjidhjen më të mirë të mundshme në këtë merkato janari për sulmuesin.
