Paralajmërimet e motit për shi janë vendosur në të gjithë brigjet lindore dhe jugperëndimore të Spanjës, me një paralajmërim të kuq të lëshuar për qytetin port të Huelva, shkruan BBC.
Të paktën 158 persona kanë vdekur pas reshjeve rekord dhe përmbytjeve në Spanjë: 155 viktima në Komunitetin Valencian, dy në Castile-La Mancha dhe një në Andaluzi
Ekipet e urgjencës po përpiqen të rivendosin shërbimet bazë në Valencia, raporton gazeta spanjolle El Pais.
Presidenti i Qeverisë së Valencias, Carlos Mazon, ka njoftuar 250 milionë euro (270 milionë dollarë) ndihmë për të prekurit.
Zyrtarët nuk kanë bërë të ditur ende numrin e personave të zhdukur, por thanë se ka “shumë”, pasi numri u rrit me rreth 60 vdekje të tjera të enjten.
Qytetarët u paralajmëruan të qëndrojnë në shtëpi për shkak të alarmit të për reshjet në jugperëndim të Spanjës
Agjencia meteorologjike spanjolle ka lëshuar një alarm të kuq për reshje shiu përgjatë bregdetit të Huelva në jugperëndim të vendit.
Paralajmërimi është dhënë për fashën 09:00 dhe 11:59 me orën lokale dhe parashikon reshje të akumuluara prej 140 mm gjatë 12 orëve.
“Vlerësohet se reshjet e shiut do të vazhdojnë me intensitet të madh në zonën e paralajmërimit gjatë orëve të ardhshme”, thuhet në përditësim.
Zona të tjera të provincës janë në alarm “portokalli”.
Mund të ketë përmbytje të mëtejshme
Sistemi i ngadalshëm i motit “Dana” që solli reshje dhe përmbytje në fillim të kësaj jave, tashmë ka filluar të dobësohet, por parashikohen disa reshje të tjera për të premten dhe të shtunën në vende.
Reshjet më të mëdha të shiut sot do të jenë të fokusuara në jug dhe lindje të Spanjës.
Paralajmërimet për reshjet janë në fuqi në veri të Valencias – veçanërisht rreth rajoneve Tarragona dhe Castellón, si dhe Menorca dhe Mallorca, në Andalucia jugperëndimore rreth Huelva dhe Condado.
Në këto rajone të prekura, mund të ketë 100 mm të tjera shi në 12 orët e ardhshme. Me tokën “e mbingopur nga shiu”, kjo mund të çojë në përmbytje të mëtejshme.
Shiu duhet të zbutet gjatë së shtunës, dhe një ditë shumë më e thatë parashikohet në të gjithë Spanjën deri të dielën.
