Partia Socialiste duket se po përjeton orë të vështira në radhët e saj, dhe nga momenti në moment pritet të shpallë sërish ndryshimin e drejtuesve të fushatës nëpër qarqe.
Dhe argementi i pritshëm do të jetë ai se kjo lëvizje bëhet për maksimalizuar votën në favor të saj në zgjedhjet e radhës parlamentare që pritet të mbahen pranverën e vitit të ardhshëm.
Por krejt ndryshe duket se është situata në prapaskenë.
Frika se Prokuroria e Posaçme SPAK mund të arrestojë Erion Veliajn nga momenti në moment, ka detyruar kryesocialistin Edi Rama që të mendojë për “asin” nën mëngë, që vendi i kryebashkiakut të Tiranës të mos ngelet bosh.
Dhe për këtë duke se është marrë vendimi. Ministri Blendi Gonxhe është thirrur nga Dibra për t’i marrë vendin Veliajt në organizimin e fushatës së PS-së në Tiranë.
Fushata në Tiranë aktualisht i është besuar Elisa Spiropalit, Erion Veliajt dhe Ogerta Manastirliut.
Por së fundmi Gonxhja ka konfirmuar angazhimin e tij në njësinë numër 6 të kryeqytetit, që përfshin zonën e Kombinatit, dhe që aktualisht është e caktuar Ogerta Manastirliu.
Konfirmimin e këtij lajmi, që në fakt qarkulloi edhe gjatë ditës së djeshme me shpejtësi nëpër portale dhe mediat online, por që për opozitën u cilësua si një lajm i dalë nga “portali i incineratorit”, Gonxhja e ka bërë përmes rrjeteve sociale.
Në faqen e tij zyrtare në rrjetet sociale, ministri Goinxhaj ka publikuar një foto-album nga një takim i zhvilluar me strukturat e PS-së në kryeqytet dhe në krah të tij gjenden ministrja Manastirliu dhe deputeti Petro Koçi. Dhe ajo që vihet re lehtësisht në këto pamje është mungesa e Erion Veliajt.
“Me kolegen Ogerta Manastirliu për angazhimin e ri politik në Tiranë, ku rrisim forcat për qarkun lokomotivë dhe fuqizojmë organizimin në çdo njësi! Kombinati në veçanti, njësia 6, ku do të optimizojmë e zgjerojmë ekipin – me frymën e gjithëpërfshirjes që Partia Socialiste e jetëzon si asnjë forcë tjetër politike, mes shokësh të çmuar të disa fushatave fitimtare që na lidh misioni i përbashkët për t’u qenë pranë qytetarëve dhe komunitetit, nga role e detyra të ndryshme që burojnë nga votëbesimi elektoral e demokratik. #PartiaSocialiste ???? #QarkuTiranë ✌️ #Zgjedhjet2025 ???????? #Shqipëria2030”, shkruan Blendi Gonxhja në komentin e tij bashkëngjitur foto-albumit në fjalë.
Ajo që mbetet për t’u parë në ditët në vijim është fakti se kjo lëvizje e Gonxhajt vjen me një urdhër të Ramës për të konfirmuar lajmin e ndryshimit të drejtuesit të Tiranës, me qëllim për të shmangur vëmendjen nga përditshmëria shqetësuese e vendit, që është përfshirë së fundmi jo vetëm në skandalet korruptive, por edhe në një situatë të rëndë kriminale, ku atentatet mafioze sa vijnë e shtohen që prej masakrës me 4 të vrarë në Dobraç të Shkodrës, si dhe dy vrasjet mafioze në Tiranë brenda pak ditësh; Apo kjo lëvizje e Gonxhajt nga Dibra në Tiranë është shenjë që Erion Veliaj e ka mbyllur përfundimisht karrierën e tij politike dhe tashmë burgu për të është i pashmangshëm, ashtu siç ka ndodhur me vartësit dhe njerëzit e tij të besuar në krye të Tiranës që sot gjenden prapa hekurave, lidhur me korrupsionin galopant me incineratorin e Tiranës, apo edhe me skandalin e vjedhjeve përmes kompanisë famëkeqe tashmë “5D Konstruksion”.
Veliaj është vënë në akuzë të fortë nga opozita për përfshirjhen e tij në aferën korruptive me inceneratorin e Tiranës, të cilën, sipas saj, Veliaj e ka kryer së bashku me Edi Ramën. Por veçanërisht me “vjedhjen spektakolare të “5D”, ku shpiku një super skemë për gllabërimin e taksave të qytetarëve të Tiranës”, thekson opozita, skemë e cila duket se e ka të pashmangshme dorëzimin para drejtësisë të kryetarit të Bashkisë së Tiranës.
Gjithsesi, zyrtarizimi i këtyre ndryshimeve mund të kërkojë disa ditë, apo javë, por burimet brenda socialistëve theksojnë formalisht se lëvizjet bëhen në kuadër të nevojës për të fuqizuar fushatën në qarkun e Tiranës.
