Ambasada e Shteteve të Bashkuara të Amerikës në Kosovë ka reaguar pas mbyllës së qendrave serbe për Punë Sociale në Kosovë.
Kjo ambasadë ka shprehur shqetësime për këtë veprim, të cilin e ka quajtur të pakoordinuar.
Tutje thuhet se këto veprime mund të kenë pasojë negative për tgë ardhmen e Kosovës në Evropë dhe marrëdhënien dypalëshe me SHBA-në.
“Ambasada e SHBA-së është e shqetësuar me mbylljet e papritura dhe të pakoordinuara të zyrave të mirëqenies së Serbisë në Kosovë. Këto dhe veprime të ngjashme ndikojnë negativisht në mijëra qytetarë të Kosovës dhe rrezikojnë të krijojnë pasoja negative për të ardhmen e Kosovës në Evropë dhe marrëdhëniet tona dypalëshe”, thuhet në reagimin e Ambasadës në rrjetin social “X”.
Autoritetet e Kosovës mbyllën dy ditë më parë katër objekte të Qendrës për punë sociale – të cilat funksiononin në kuadër të sistemit paralel serb – për shkak të dyshimit se aty janë kryer “veprime të paligjshme lidhur me procesin zgjedhor”.
Policia e Kosovës tha përmes një deklarate se kërkoi leje nga Prokuroria Themelore në Mitrovicë për t’i kontrolluar objektet e Qendrave për punë sociale pasi katër punonjës të kësaj Qendre në Zubin Potok ishin arrestuar më 8 shkurt për “shkelje të vullnetit të votuesve”.
