Një grup shkencëtarësh ndërkombëtarë ka bërë një zbulim të jashtëzakonshëm në shkretëtirën Rub’ al Khali, e njohur ndryshe si “Lagjja e Zbrazët”. Sipas një studimi të publikuar në revistën shkencore Communications Earth & Environment, rreth 9000 vjet më parë ky rajon ishte i mbuluar nga ujërat dhe jo nga rëra, siç është sot.
Ekipi kërkimor, i udhëhequr nga Dr. Abdalla Zaki nga Universiteti i Gjenevës, ka kryer analiza gjeomorfologjike dhe krahasime me të dhëna arkeologjike, duke zbuluar gjurmë të një liqeni të madh me sipërfaqe prej 1100 km² dhe thellësi deri në 42 metra. Po ashtu, janë identifikuar gjurmë të një lumi me gjatësi 150 kilometra dhe dëshmi të reshjeve intensive musonike.
Sipas shkencëtarëve, nga viti 11.000 deri në 5.500 para erës sonë, ky territor përjetoi një klimë të lagësht, e njohur si periudha e “Arabisë së gjelbër”. Këto kushte klimatike krijuan mjedis të favorshëm për vendosjen e gjuetarëve-mbledhësve dhe zhvillimin e komuniteteve të hershme baritore.
Megjithatë, rreth 6000 vjet më parë, rajoni u përball me një tharje të papritur dhe të thellë, që solli ndryshime të mëdha në mënyrën e jetesës dhe në ekosistemet që kishin lulëzuar më herët. Ky zbulim sjell një kuptim të ri për historinë klimatike dhe njerëzore të Gadishullit Arabik./Report.az
