BE-ja është në vlim ndërsa Presidenti serb Aleksandar Vuçiç planifikon të marrë pjesë në paradën e Rusisë më 9 maj. BE-ja e ka paralajmëruar Serbinë të heqë dorë nga Putini, ose t’i thotë lamtumirë anëtarësimit në BE.
Diplomatët e lartë e quajnë atë një “provë lakmusi” besnikërie, me kërcënime për të penguar bisedimet e pranimit të Serbisë.
“Çdo pjesëmarrje në paradat ose festimet e 9 majit në Moskë nuk do të merret lehtë nga pala evropiane, duke pasur parasysh se Rusia po zhvillon një luftë në shkallë të plotë në Evropë”, u tha Kaja Kallas gazetarëve në Luksemburg të hënën. “Ne e bëmë shumë të qartë se nuk duam që asnjë vend kandidat të marrë pjesë në këto ngjarje më 9 maj në Moskë”, shtoi ajo.
Përfaqësuesja e Lartë e BE-së, konfirmoi se çështja u diskutua gjatë një takimi të kohëve të fundit të ministrave të jashtëm të BE-së. Ajo vuri në dukje se shumë shtete anëtare shprehën kundërshtim ndaj vendeve kandidate që bashkohen me çdo festim në Moskë. “Një pjesëmarrje e tillë nuk do të mirëpritej”, tha ajo, siç citohet nga Index, duke theksuar qëndrimin e unifikuar të BE-së kundër agresionit rus.
Bashkimi Evropian e ka paralajmëruar Serbinë duke e paralajmëruar se pjesëmarrja e mundshme e Presidentit Aleksandar Vuçiç në paradën e Ditës së Fitores në Rusi muajin e ardhshëm mund të rrezikojë procesin e pranimit të vendit në BE, raportoi transmetuesi serb N1.
Shqetësimet u shfaqën pasi media shtetërore ruse raportoi se Vuçiç mund të marrë pjesë në paradën e 9 majit në Moskë dhe se Serbia gjithashtu do të kontribuonte me trupa dhe pajisje ushtarake në këtë ngjarje. Në përgjigje, disa zyrtarë të BE-së deklaruan se një pjesëmarrje e tillë do të binte ndesh me vlerat e pritura nga një vend kandidat, veçanërisht duke pasur parasysh luftën e vazhdueshme të Rusisë në Ukrainë.
Ndër kohë, Kryeministri i Sllovakisë Robert Fico këmbëngul të marrë pjesë në paradën e ‘Ditës së Fitores’ në Moskë pavarësisht paralajmërimeve të BE-së. Sllovakia, një vend tjetër me lidhje historikisht të ngushta me Moskën, është ftuar gjithashtu në paradë. Kryeministri Fico ka lënë të kuptohet se mund të marrë pjesë, duke e bërë atë një nga të paktët udhëheqës të BE-së që mban kontakt të drejtpërdrejtë me Presidentin rus Vladimir Putin në vitet e fundit.
“Askush nuk mund të më urdhërojë se ku të shkoj ose të mos shkoj”, u kundërpërgjigj kryeministri i Sllovakisë Robert Fico, pasi shefi i politikës së jashtme të Bashkimit Evropian i paralajmëroi udhëheqësit e kontinentit të mos udhëtonin në Moskë për paradën vjetore të fitores në Luftën e Dytë Botërore.
I njohur për qëndrimet e tij miqësore me Kremlinin, Fico ka thënë vazhdimisht se do të marrë pjesë në festimet ushtarake në kryeqytetin rus më 9 maj për të shënuar 80-vjetorin e mposhtjes së Gjermanisë naziste.
Fico i konsideroi komentet e Kallas “të pahijshme”. “Zonja Kallas, do të doja t’ju informoja se unë jam një kryeministër legjitim i Sllovakisë, një vend sovran”, tha Fico në një deklaratë. “Askush nuk mund të më urdhërojë se ku të shkoj ose të mos shkoj”. “Do të shkoj në Moskë më 9 maj”, shtoi ai.
Qëndrimi i Ficos ka qenë kundër mbështetjes ushtarake të vendit të tij për Ukrainën, ka kritikuar ashpër sanksionet e BE-së ndaj Rusisë, ka debatuar me Kievin për tranzitin e gazit rus nëpër vend dhe është zotuar të bllokojë Ukrainën nga anëtarësimi në NATO
Nga ana tjetër, kryeministri hungarez Viktor Orban, i konsideruar gjerësisht si aleati më i ngushtë i Putinit brenda BE-së, thuhet se ka refuzuar të marrë pjesë në këtë ngjarje.
