E drejta e pronës vijon të mbetet një ndër problemet më të prekshme për shqiptarët. Gjatë raportimit vjetor në Komisionin e Ligjeve, Avokati i Popullit theksoi se pavarësisht rekomandimeve të bëra situata vijon të mbetet e njëjtë. Çështje të tjera të mprehta për shoqërinë shqiptare renditen edhe reforma në administratën publike, strehimi si dhe furnizimi me energji i familjeve të varfëra. Totozani: Për sa i përket të drejtës së pronës, vazhdon të ketë probleme të mëdha. Mosrespektimi nga ana e organeve të administratës publike të parimit të ligjshmërisë, mbrojtjes së interesit publik, të drejtave të personave privatë, eficencës për administratën e pushtetit vendor pas reformës administrative. Sikurse e dini ka një numër problematikash, në procedurat e largimit nga puna në kuadër të procesit të ristrukturimit. Strehimi mbetet gjithashtu një sfidë e madhe në Shqipëri. Shumë bashki nuk zotërojnë fonde. Sipas Avokatit të Popullit mungesa e përgjigjeve dhe e bashkëpunimit me institucionet shtetërore ka vijuar të vështirësojë punën e këtij institucioni. Totozani: Mbeten disa sfida siç janë shpeshherë, mospërgjigja apo mosbashkëpunimi nga institucionet shtetërore sidomos sa i përket moskthimit të përgjigjeve apo kërkesave të adresuara ndaj tyre. Kemi pasur disa raste pengese gjatë punës tonë. Gjatë vitit 2015, Avokati i Popullit ka adresuar 349 rekomandime, ndër të cilat 68 janë pa përgjigje,54 Rekomandime janë refuzuar dhe 160 janë pranuar.
