Luhet në “Emirates Stadium” supersfida e javës së 30-të në Premier Leaguen angleze. Arsenali pret Manchester City në një duel të drejtpërdrejtë për zonën Champions që pritet të dhurojë emocione të mëdha. Për Pep Guardiolën, kjo ndeshje vlen vërtetë shumë, sepse City i tij kërkon të rikthehet te fitorja në kampionat pas 2 barazimeve radhazi brenda në Etihad.
“Në këto lloj ndeshjesh ndaj skuadrave të mëdha, ekipi që fiton ka shanse të mira për të siguruar objektivin sezonal, sepse mbi të gjitha ndal një rival direkt. Manchester City ka edhe 10 ndeshje për të luajtur deri në fund të sezonit dhe për të tentuar të pozicionohemi sa më lart në renditje duhet fillimisht të fitojmë ndaj Arsenalit. Kemi ende shumë gjëra për të përmirësuar. Duhet të rregullojmë gabimet dhe të kërkojmë të japim më të mirën tonë në fushë. Kjo sfidë është shumë e rëndësishme për ne, por edhe për Arsenalit, ashtu siç janë vendimtare edhe sfidat e radhës që kemi ndaj Chelsea-it, Hull City-it dhe Southampton-it. Wenger? Çfarë mund të them për të. Fakti që drejton një skuadër për kaq shumë vite, tregon për rëndësinë që ka ai te Arsenali. Arsene është shumë i zoti dhe e ka merituar të qëndrojë në krye të Arsenalit për një kohë kaq të gjatë”, u shpreh Guardiola.
Gundogan dhe Gabriel Jesus do të jenë dy mungesat e rëndësishme të Manchester City-it në këtë ndeshje, ndërsa në krahun tjetër, portieri Peter Cech dhe mesfushori Santi Cazorla do të jenë mungesat e mëdha të Arsenalit. Sipas Arsene Wenger ajo e “Emirates Stadium” do të jetë një ndeshje e madhe dhe të gjithë lojtarët duhet të tregohen në lartësinë e duhur.
“Kjo është një sfidë që do të ndiqet nga e gjithë bota dhe të gjithë lojtarët që do të luajnë duhet të shfaqin më të mirën e repertorit të tyre. Bëhet fjalë për dy skuadra që pëlqejnë futbollin sulmues. Është një ndeshje decizive për të dy ekipet, por më tepër për ne. Duam ta fitojmë, sepse e luajmë përpara tifozëve tanë, por nuk do të jetë një mision aspak i thjeshtë të mposhtim, Manchester City-in e Pep Guardiolës”, u shpreh Wenger.
