Sezonin e ardhshëm Reali i Madridit mund të ketë një trajner të ri. Në javën më vendimtare të sezonit me Realin që do të sfidojë fillimisht Atleticon në derbin e Madridit dhe më pas Bayern Munich në sfidën e parë të çerekfinaleve të Champions-it, trajneri francez Zinedine Zidane la të kuptohet se e ardhmja e tij në krye të klubit merengues është në dyshim. “Nuk e di nëse do të jem pjesë e skuadrës edhe sezonin e ardhshëm dhe kjo është një nga arsyet që nuk kam programuar asgjë për të ardhmen. E di se çfarë do të thotë të drejtosh Realin e Madridit në të mirë dhe në të keq, prandaj ajo që më shqetëson është vetëm ndeshja e radhës, nuk e di se çfarë do të ndodhë më vonë”, u shpreh Zidane.
Ishin pikërisht këto deklarata që tërhoqën vëmendjen e gazetarëve në konferencën për shtyp përpara ndeshjes ndaj Atleticos. Në këtë fazë të sezonit çdo ndeshje është shumë e rëndësishme për Los Blancos. Në derbin e Madridit, Realit i rikthehet në dispozicion treshja e famshme sulmuese BBC.
“Në këtë sfidë ne kemi shumë nevojë për mbështetjen e publikut. Presim që tifozët tanë të na japin një tjetër shtysë për ta mposhtur Atleticon në “Bernabeu”. Nuk do të jetë një ndeshje e lehtë për ne e dimë që do të vuajmë, por do të bëjmë gjithçka për të marrë tre pikët. Ronaldo, Bale dhe Benzema janë mirë dhe janë gati për të ndihmuar skuadrën në këtë fund sezoni. Por Reali nuk është vetëm BBC, pasi të gjithë lojtarët janë të rëndësishëm për ne. Duam ta fitojmë La Ligan dhe nuk e mendojmë aspak dështimin”, tha trajneri i madrilenëve.
Antoine Griezmann ylli i Atleticos së Madridit deklaroi se, Los Colchoneros janë favoritë në derbi, por ndryshe nga sulmuesi francez, trajneri Diego Simeone mendon se kjo sfidë nuk ka favoritë. El Cholo konfirmoi mungesën e Kevin Gameiros, ndërsa zbuloi edhe një detaj shumë interesant.
“Më krenar më bën fakti që kemi barazuar ndaj Barcelonës në “Camp Nou” sesa të fitojmë ndaj Realit në “Bernabeu”. Për ne nuk ka shumë rëndësi se kë kemi përballë. Është një ndeshje si gjithë të tjerat dhe do të hymë në fushë vetëm për 3 pikët, pasi kemi nevojë për pikë për të arritur objektivat tona. Reali do të na vendosë në presion në 20 apo 25 minutat e para. Mendoj se bashkë me BBC do të jetë në fushë Isco, pasi me të ata mund ta kontrollojnë më mirë topin sesa me Casemiron. Është një ndeshje ku nuk ka favoritë për suksesin final.
