Zinedine Zidane nuk e sheh Realin e Madridit si favorit. Në prag të “El Clasico” trajneri i klubit madrilen ka folur në lidhje me super sfidën kundër Barcelonës. Tekniku francez në komunikimin e tij me mediat ka kërkuar që të ulë euforinë që ka përfshirë kampin merenges, pas kualifikimit për në fazën gjysëmfinale të Champions League. Zidane u shpreh se skuadra e tij nuk vjen si favorite në këtë takim dhe se duhet patur kujdes maksimal nëse vërtet dëshiron fitoren përballë Barcelonës.
“Është një nga ndeshjet më të rëndësishme dhe për ne ky takim vjen në një moment, ku skuadra ka arritur të shfaqë një formë të mirë fizike, por edhe në nivel loje. Nuk do të jetë e lehtë dhe askush nuk mund të thotë që ne jemi favoritë për ta fituar këtë ndeshje, sepse përballë kemi një kundërshtar që nuk mund ta nënvlerësosh. Kemi zhvilluar seanca stërvitore në mënyrë intensive dhe kemi përgatitur me kujdes çdo detaj. Sigurisht që presioni ekziston, pasi është një sfidë delikate. Për ne është shumë e rëndësishme fitorja dhe nëse japin maksimumin tonë, atëherë jam i bindur se suksesi do të vijë”, u shpreh Zidane.
Më tej numri një i stolit të Realit foli për gjendjen fizike të sulmuesit Gareth Bale, i cili ka lënë pas dëmtimin e pësuar në pjesën e pulpës dhe i është rikthyer stërvitjes së bashku me pjesën tjetër të grupit. “Bale e ka lënë pas dëmtimin dhe ka zhvilluar seancat stërvitore së bashku me pjesën tjetër të grupit. Nëse do të aktivizohet apo jo, ende nuk e kam vendosur, pasi më duhet të marr edhe konfirmim nga ana e stafit mjekësor”, tha trajneri i Real Madridit.
Tekniku francez gjatë konferencës u pyet dhe në lidhje me yllin portugez Cristiano Ronaldo, i cili në 2 ndeshjet çerekfinale të Champions League kundër Bayern të Mynihut është shfaqur deciziv me golat e tij. Nisur nga kjo pritet që Ronaldo të shfaqet si protagonist kundër blaugranave. “Fizikisht dhe psikologjikisht ai është përgatitur për këtë ndeshje, njësoj si të gjithë futbollistët e tjerë. Në sfida të mëdha emri i tij përmendet gjithmonë dhe ai ka ditur të japë kontributin e tij në mënyrën më të mirë”, përfundoi Zidane.
Kapiteni dhe mbrojtësi i Real Madridit, Sergio Ramos, përmes një postimi në rrjetet sociale, ka bërë të ditur se janë gati për sfidën e nesërme kundër Barcelonës. “Gjithmonë me të bardhën. Është koha për El Clasico. #HalaMadrid”, ka shkruar ai në Facebook. Real Madridi pret Barcelonën në “Santiago Bernabeu” të dielën, ndeshje kjo që zhvillohet nga ora 20:45.
