Operatorët turistikë përgjatë vijës bregdetare të Durrësit kërkojnë që Bashkia të lejojë autobuzët me pushues nga Kosova të hyjnë në rrugën “Pavarësia”. Bashkia ka vendosur të mos i lejojë këta autobuzë të kalojnë e të parkojnë në këtë rrugë me argumentin se krijohet kaos në trafik. Por sipas operatorëve, ky vendim po dëmton turizmin, pasi pushuesit ndërrojnë destinacion dhe po e braktisin bregdetin e Durrësit për shkak të kësaj anomalie.
Edhe vetë pushuesit kosovarë shprehen të pakënaqur me këtë vendim, ndërsa thonë se do ta braktisin bregdetin e Durrësit nëse vijon kjo situatë kaotike. “Bëjmë 5 orë rrugë nga Kosova për të ardhur me pushime, ndërsa shteti i Shqipërisë na pengon që të shkojmë në plazh, duke na kthyer mbrapsht”, shprehet një pushues nga Kosova. Ky vendim i Bashkisë është marrë që në hartimin e projektit për rikonstruksionin e rrugës “Pavarësia”.
