Ancelotti, kampioni i fundit i Superkupës së Gjermanisë, pasi mundi Dortmundin me penallti, dëshiron të forcojë mesfushën e vet me një lojtar të ri dhe të gjithanshëm, i cili, gjithashtu, mund të veprojë si qendror. Zgjedhja është Eric Dier, një nga perlat e Tottenham, 23 vjeç. Për të, sikurse raportonte dje “The Sun”, Bayern Munich është i gatshëm të ofrojë 50 milionë euro para mbylljes së merkatos. Kështu, gjermanët do të mbulojnë një largim të mundshëm të Renato Sanches dhe do të rrëmbejnë një nga kërkesat e Mourinhos, një rival i drejtpërdrejtë në Europë. Nga Anglia sugjerojnë se Pochettino ka vendosur të investojë miliona, të cilët të shkojnë për nënshkrimin e Barkley, mesfushorit të Everton. Megjithatë, marrëveshja nuk do të jetë e lehtë, sepse klubi i Liverpool ka vënë një çmim për lojtarin mbi 50 milionë euro.
