Ish-nënkryetari i Bashkisë Tiranë, Enno Bozdo ka ironizuar dje show-n mediatik të Veliajt ku ftoi publikisht qytetarët të protestonin para Gjykatës së Apelit.
“Veliaj fton njerëzit të protestojnë përpara Gjykatës së Apelit? Tipike revolucionare! Sovjetët mbi gjithçka! Ftesë për të dhunuar drejtësinë pasi ka dhunuar Tiranën. Pasi është shfaqur dje në ‘Opinion’ si kryebashkiaku më ordiner që Tirana ka patur ndonjëherë, kërkon të heqë vëmendjen nga kulla me stadium në mes të Tiranës, nga lejet për kullë në lulishten pas ‘Qemal Stafës’, nga kulla tek këndi i lojërave ‘7 xhuxhët’, nga leja te lulishtja pas TOB, nga leja për kullë në Sheshin Skënderbej dhe tek lulishtja përballë Muzeut Historik Kombëtar, si dhe nga betonizimi i Parkut të Liqenit. Kështu kërkon të fshehë përgjegjësinë para qytetarëve të Tiranës njeriu që mashtroi se nuk do të rriten taksat, mashtroi se nuk do të rritet çmimi i biletës, mashtroi se nuk do të lejonte asnjë ndërtim në Tiranë. Të gjitha këto janë bëmat e tij, vetëm në një periudhë 10-mujore. Vreri i lëshuar sot tregon shumë për mënyrën sesi ai po e qeveris Tiranën. Por qytetarët e njohin, Tirana e njeh, të gjithë e njohin. Dhe askush nuk e respekton!”, shprehet Bozdo në reagimin e tij.
