Laert Haxhiu, personi i shpallur në kërkim si autor i dyshuar për atentatin në Lushnjë, ku mbetën të vrarë dy persona, nuk është një emër i panjohur për policinë. Haxhiu, 25 vjeç, është cilësuar si pjesë e bandës rivale të Aldo Bares. Haxhiu kishte vetëm 8 muaj që kishte dalë nga burgu për vrasjen e anëtarit të bandës së Lushnjës, Gerti Lalës i njohur me nofkën “Iriqi”, kur u arrestua në 2015-ën për trafik droge. Ndonëse Haxhiu tentoi t’i shpëtonte policisë, por pasi u hodh nga 3-4 metra lartësi, theu këmbën.
Si u lirua Laert Haxhiu, ishte arrestuar për trafik droge
Në qershor të vitit 2015, Laert Haxhiu, një nga personat e shpallur në kërkim për masakrën e së mërkurës në Lushnjë është arrestuar si shitës i një sasie prej 1.2 kilogramësh heroinë. Ai është dërguar si i pandehur në Gjykatën e Durrësit për akuzën e “prodhimit dhe shitjes së narkotikëve”, në bashkëpunim. Ndonëse Prokuroria ka kërkuar dënimin e tij me 8 vite burg, Gjykata ka vlerësuar se ai duhet të fajësohej vetëm për akuzën e “moskallëzimit të krimit”.
“ABC News” ka siguruar një kopje të vendimit të Gjykatës së Durrësit të datës 19 maj 2016, sipas të cilit, Haxhiu është dënuar me vetëm 17 muaj e 10 ditë burg.
I shpalluri në kërkim për masakrën është arrestuar nga policia në maj të vitit 2015, në ambjentet e lokalit të një karburanti në aksin rrugor Durrës-Rrogozhinë. Sipas Prokurorisë, ai ishte një nga dy shitësit e sasisë së heroinës, që u shkëmbye në parkingun e karburantit.
Në momentin e ndërhyrjes së policisë, ai u hodh nga një lartësi, ku edhe dëmtoi këmbën. Por në përfundim të shqyrtimit gjyqësor Gjykata vlerësonte se nuk provohej përfshirja e tij në pazarin e drogës. “I pandehuri Laert Haxhiu, duke qenë prezent në momentin e shkëmbimit të lëndës narkotike ka marrë dijeni për një krim dhe kishte detyrimin për të kallëzuar atë”, arsyetonte Gjykata.
Sipas vendimit, tre të pandehurit e tjerë të së njëjtës çështje Saimir Taullau, Kastriot Zaimi dhe Afrim Demiri u deklaruan të fajshëm për akuzën e “prodhimit dhe shitjes së narkotikëve”. Në vendimin e Shkallës së Parë të Durrësit zbardhen edhe bisedat e përgjuara të të pandehurve pas arrestimit, ku ata diskutojnë për origjinën e drogës.
