Në një artikull investigativ të revistës italiane “Lespresso” publikuar në janar të 2006, Durim Keçi deri më vitin 2005 rezultonte në listën e bosave mafiozë më të rrezikshëm në Itali, ndaj të cilëve ushtrohej regjimi i burgimit special i quajtur “41 bis”.
Ky lloj trajtimi nënkupton një izolim të plotë të të burgosurit pa asnjë mundësi komunikimi me të burgosurit e tjerë, mbikëqyrje speciale, limitim të komunikimit me familjarët dhe avokatët, ndalim i marrjes së ushqimit apo objekteve të tjera nga jashtë burgut, ndalim i mbajtjes në qeli të objekteve personale, etj.
Nën këtë regjim special burgimi, ndodhen aktualisht bosat mafiozë të “Cosa Nostra” si Toto Riina, Bernardo Provenzano, Matteo Messina Denaro etj.
Në materialin investigativ të revistës italiane “L’Espresso”, deri më vitin 2005 në listën e të dënuarve të rrezikshëm në Itali e nën regjimin e burgimit të ashpër “41 bis” ndodheshin dhe dy bosa mafiozë shqiptarë: Haki Aleksi me aktivitet kriminal në Xhenova e Durim Keçi.
Investigimi i revistës italiane zbulon se në fund të 2005 dy bosave shqiptarë Haki Aleksi e Durim Keçi, u hiqet regjimi i burgimit të izoluar “41 bis”.
“Surprizisht zbulojmë, shkruan “L’ Espresso” se vendimin për deklasimin dhe heqjen e “41 bis” ndaj dy bosave mafiozë shqiptarë, nuk e merr siç bëhet zakonisht nga Gjykata e Mbikëqyrjes, por ky vendijm vjen drejtpërdrejtë nga Ministria italiane e Drejtësisë, e cila drejtohej në atë kohë nga Roberto Castelli, eksponent i lartë politik i forcës “Lidhja e Veriut”.
“Vetëm në 3 raste të tjera ndaj 3 bosave më të vegjël mafiozë, ministri i Drejtësisë ka marrë një vendim të tillë”, shkruan “L’ Espressso”. E kush e di ç’mendojnë pas këtij fakti votuesit e Lidhjes së Veriut kaq të ndjeshëm ndaj kriminalitetit ballkanik”.
Pas deklasimit, pra pas heqjes së regjimit të burgut special “41 bis”, i dënuari kthehet në një të burgosur të zakonshëm.
Kryetari i PD, Basha një ditë më parë bëri publike fotot e të shumëkërkuarit nga Interpoli dhe Policia italiane të Durim Keçit, i cili rezulton që të jetë një nga anëtarët e stafit elektoral në fushatën e fundit të Ramës për zgjedhjet parlamentare të 25 Qershorit. Në foto Keçi shfaqet në një mbledhje të shtabit elektoral. Në një foto tjetër, Durim Keçi është me dorën në krah të ministrit Klosi, i cili tani është ministër i Mjedisit. Në një tjetër foto, Durim Keçi shfaqet në krah të Administratorit socialist të Shijakut të vendosur nga Rama dhe Dako.
