Një mekanizëm raketash i vendosur nga SHBA në Rumani me qëllim mbrojtjen e Amerikës dhe Europës nga një sulm i të ashtuquajturëve shtete të kuqe është një hap drejt një tjetër lufte të ftohtë. Kështu ka deklaruar presidenti i Rusisë Vladimir Putin, i cili po ashtu kërkoi ndryshimin e buxhetit për t’iu kundërpërgjigjur çdo kërcënimi.
Në fjalën e tij përpara zyrtarëve kryesorë të mbrojtjes dhe forcave ushtarake kreu i shtetit rus u shpreh se kjo lëvizje e SH.b. ka si qëllim të bllokojë arsenalin bërthamor të Rusisë.
“Nuk është një sistem mbrojtës. Kjo është një strategji e SHBA për të sjellë armët nukleare në periferi të Rusisë, siç është në këtë rast Rumania. Ata që morën këtë vendim duhet të dinë se deri më tani kanë jetuar në paqe e siguri, por tashmë që ato raketa ndodhen aty ne jemi të detyruar të mendojmë se federata ruse është nën kërcënim.
Më tej, Putin theksoi se shteti që ai drejton nuk do të përfshihet në këtë garë bërthamore, por do të vazhdojë të ndërtojë armë për forcat e saj ushtarake dhe flotën detare, dhe do të vijojë të shpenzojë në mënyrë që të ruajë balancat me të tjerët. Ai po ashtu tha se kërcënimi bërthamor që vjen nga Irani nuk duhet të merret seriozisht, pasi u shfrytëzua nga Uashingtoni për të ndërtuar mburojën me raketa.
Të enjten Zv/Sekretari amerikan i Mbrojtjes Robert Work deklaroi se kjo mburojë e vendosur në Rumani nuk do të përdoret për të kërcënuar Rusinë.
