“Transparency International” ka publikuar së fundmi një raport me titull; njerëzit dhe korrupsioni; zëri i njerëzve nëpër botë. Ky raport fokusohet në gjetjet e barometrit global të korrupsionit. Transparency International i kategorizon shtetet e botës në 9 rrethe, po aq sa ç`janë edhe ato të ferrit të Dantes. Shqipëria rezulton në rrethin e gjashtë, si asnjë vend tjetër i rajonit. Serbia dhe Bosnje Hercegovina janë në rrethin e 5-të. Maqedonia dhe Kosova në të tretin dhe Mali i Zi në rrethin e katërt. Në Europë ndërkohë, Rusia dhe Ukraina janë në të njëjtin rreth me ne, ndërkohë që Moldavia është në të shtatin.
Rrathët i referohen përqindjes së qytetarëve që kanë paguar ryshfet në administratën publike në 12 muaj e fundit. Rrethi i gjashtë, ku edhe klasifikohet Shqipëria, i referohet një përqindje nga 30% deri në 40%, që është relativisht e lartë dhe flet për një nivel korrupsioni alarmant. Transparency International është një ndër organizmat më prestigjioz në nivel global për matjen e korrupsionit dhe ofron çdo vit të dhëna mjaft interesante që mundësojnë edhe krahasimin mes vendeve të ndryshme të botës për një ndër plagët më të mëdha të shoqërisë sonë; korrupsionin.
Të njëjtin shqetësim konfirmon edhe Banka Botërore në lidhje me nivelin e korrupsionit qeveritar në Shqipëri.
Media ekonomike italiane ‘IlSole 24Ore’ ka përpunuar të dhënat e fundit të Bankës Botërore për indeksin e qeverisjes, duke u përqendruar në treguesin e korrupsionit dhe zbatimit të ligjeve, dy tregues që lidhen ngushtësisht me njëri-tjetrin, ku dhe rezulton që Shqipëria çalon dukshëm.
Indekset e Bankës llogariten duke marrë një vlerë maksimale prej 2.5% dhe minimale prej -2.5%. Në Shqipëri, treguesi më negativ është ai i korrupsionit, që merr -0.398 pikë, duke bërë që vendi ynë të hyjë në listën e shteteve që nuk e kontrollojnë dot këtë fenomen, së bashku me vende si Tajlanda, Brazili, Indonezia.
Nga vendet e rajonit, më mirë se ne janë Mali i Zi, Greqia, Bullgaria, Serbia, Maqedonia, ndonëse të gjitha renditen në zonën negative. Pothuajse në të njëjtin nivel me Shqipërinë është Kosova dhe pak më keq renditet Bosnjë-Hercegovina, shteti që ka problem të shumat për shkak të ndarjes etnike.
Shteti që nuk arrin të kontrollojë më shumë korrupsionin në botë është Somalia, që e ka këtë tregues -1.68, ndërsa vendi më pak i korruptuar është Zelanda e Re, i ndjekur nga shtetet nordike, përkatësisht Finlanda, Suedia, Norvegjia, Suedia.
Në indeksin total të qeverisjes, publikuar pak kohë më parë nga Banka Botërore, i cili mat gjashtë elemente (kontrolli i korrupsionit, efikasiteti i qeverisjes, stabiliteti politik dhe mungesa e dhunës, cilësia e ligjeve, zbatimi i ligjeve, liria e shprehjes), Shqipëria renditet në vend të 100, duke lënë pas Kosovën, Maqedoninë, Bosnjën, ndërsa pak më mirë është Serbia. Treguesi tjetër ku Shqipëria ka marrë pikë negative është ai i zbatimit të ligjeve, ku merr një pikëzim negativ prej -0.347, që është më i keqi në rajon, së bashku me Kosovën. Në këtë tregues paraqitet më pozitiv edhe Bosnja, që është shteti më problematik në Ballkan.
Në një tregues që zbatimi i mirë i ligjeve lidhet ngushtësisht me nivelin e ulët të korrupsionit, shtetet që kanë zbatimin më të mirë të ligjeve në botë janë ato që kanë dhe korrupsionin më të ulët, pra sërish kryesojnë në këtë indeks shtetet nordike, ku e para është Suedia, e ndjekur nga Norvegjia dhe Finlanda.
