Historia e Mariano-s është një shpërdorim i talentit. Ai ka qenë më i talentuar në shtëpinë Dybala, por nuk ka pasur dëshirë për t’u stërvitur dhe është larguar shumë shpejt nga radarët e futbollit të rëndësishëm. Kështu, kur Paulo (13 vjeç) ka nisur fluturimin e tij, ai e ka marrë përdore me hijen e atij që e di si shkojnë gjërat në botën e futbollit dhe jo vetëm. Por hapat e parë nuk kanë qenë të menduar mirë. Mariano, vëllai i “Joya”-s, ka vendosur të bashkëpunojë me menaxherët Omar Peirone dhe Gonzalo Rebasa, duke krijuar një konflikt me Gustavo Mascardi-n, ai që e dërgoi sulmuesin në Itali. Një konflikt ky që ka krijuar disa probleme edhe me Palermo-n. Ka qenë 2012-ta. Situata është qetësuar, pasi Pierpaolo Triulzi është bërë menaxheri i Paulo-s dhe Mariano është larguar nga skena. Problemet janë kthyer gushtin e kaluar, me familjen Dybala që ka dalë kundër Triulzi-t dhe nuk ka pranuar të njohë disa marrëveshje të rëndësishme që menaxheri kishte arritur me sponsorë të ndryshëm. Për shkak se i kishte shitur të drejtat e imazhit, “Joya” i detyrohej një përqindje menaxherit të tij, por Mariano vendos të ndryshojë rrugë. Kur kishin mbetur 10 ditë nga mbyllja e merkatos së verës ka provuar të tundojë Barcelona-n, por më kot.
NEGOCIATA – Juventus është munduar t’i bëjë qejfin Dybala-s, por nuk ka qenë e lehtë. Që në fillim klani argjentinas ka punësuar një avokat katalanas dhe një asistent italian. Por strategjia e tyre nuk i bind. Atëherë ka hyrë në skenë një avokat argjentinas. Ndërkohë Triulzi i është drejtuar Gjykatës Sportive për shumë që i takonte, ndërsa sponsorët kanë marrë kohë (për momentin), edhe për shkak të punës diplomatike të bërë nga klubi bardhezi. Juventus, siç dihet, ka si partner Adidas, rivalin e Puma-s, që ka një marrëveshje të rëndësishme me Paulo-n. Administratori i deleguar, Beppe Marotta, dhe stafi i tij po punojnë për të gjetur zgjidhjen më të mirë të mundshme për ta liruar lojtarin nga ajo marrëveshje.
VËLLEZËR TË NDRYSHËM – Por është e qartë se lëvizjet e bëra nga Mariano nuk ndihmojnë asnjë. Kohët e fundit ka shkuar në Paris, siç është zbuluar nga vetë ai me një fotografi të publikuar në rrjetet sociale (por nuk është takuar me PSG), ndërsa në Argjentinë është shkruar për kontakte me City dhe United. E vërteta është se Juventus nuk po negocion me asnjë dhe Paulo e di mirë se këto zëra nuk bëjnë gjë tjetër vetëm sa e dëmtojnë atë. Rreziku është që vlera e tij, në një moment ku ai nuk po shkëlqen, të pësojë një rënie. Për të njëjtën arsye është e dobishme që çështja e të drejtave të imazhit të zgjidhet shumë shpejt. Peripecitë e këtyre muajve tregojnë se Dybala-s i duhen këshilltarë të aftë. I takon familjes të bëjë zgjedhjen e duhur dhe, në këtë aspekt, duhet mbajtur në konsideratë edhe roli i mamasë dhe i vëllait tjetër Gustavo, me këtë të fundit që ka ide më pak ekstreme se Mariano. Por është shpejt për të parashikuar devijime të tjera gjatë rrugës.
