Juventus vazhdon të jetë e impenjuar në të gjitha kompeticionet, në Champions duhet të përballet akoma me Tottenham, për një vend në çerekfinalen e kompeticionit më elitar në kontinent, pas barazimit 2-2 në shtëpinë e bardhezinjve në takimin e parë. Në përfundim të ndeshjes së luajtur në Torino, trajneri i Spursave deklaroi se gjithçka ishte ende e hapur, pavarësisht se anglezët arritën të barazojnë shifrat, madje duke shënuar dy gola në fushën kundërshtare. “Jam krenar që arritëm të dominojmë në Torino, por me rezultatin 2-2 asgjë nuk është vendosur ende”. Për radion napoletane “Crc”, Pochettino foli edhe për trajnerin e Napolit, Sarri: “Nuk kam asgjë për të këshilluar një trajner si Sarri, që është një prej teknikëve më të mirë në botë. Napoli mund të fitojë titullin kampion në Seria A, futbolli i Sarrit është fantastik për t’u parë, unë kur mundem, tentoj të ndjek ndeshjet e të kaltërve. E kam ndjekur Callejon që nga Spanja, ndihem i lidhur me atë. Ishte një futbollist i imi te Espanyol. Sarri është Sarri, ndërsa Guardiola është Guardiola. Çdo trajner ka stilin e tij. Unë kërkoj të rritem çdo ditë. Çdo rrugë është e mirë për të fituar, natyrisht duhen futbollistë të fortë për të fituar. Nevojitet të ndjesh futbollin tënd dhe ta trasmetosh atë te futbollistët me kujdes dhe dashuri, ky është sekreti”.
