Duket se FMN-së po i soset durimi me qeverinë, e cila nga njëra anë ka përqafuar politika të dyshimta ekonomike dhe nga ana tjetër refuzon të shohë realitetin në sy.
Muajt e fundit deklaratat e FMN-së, veçanërisht në lidhje me koncesionet, korrupsionin dhe kleintelizmin, kanë ardhur duke u bërë gjithnjë e më pak diplomatike dhe pa doreza.
Dy ditë më parë ndodhi një tjetër episod domethënës që dëshmon dëshpërimin e FMN-së me papërgjegjshmërinë e qeverisë. Gjatë një konferencë për shtyp për situatën ekonmike, ministri Ahmetaj, duke ju drejtuar publikisht sipërmarrësve të vendit u shpreh se:
“Shijojeni pranverën e lënies mbrapa të krizës dhe të gjitha informacionet e tjera, më vonë. Nuk i gëlltisim dot njëherësh të gjitha informacionet, ndaj t’i rregullojmë avash avash”.
Por në mënyrë haptazi jodiplomatike dhe në dukje nervoze, përfaqësuesi i FMN-së Jens Reinken nuk e la të shkojë pa e kundërshtuar këtë deklaratë të zotit Ahmetaj, edhe pse ajo nuk qe ndonjë deklaratë e rëndësishme. Ai mori fjalën menjëherë pas zotit Ahmetaj dhe u shpreh:
“Kur unë flas me përfaqësues të sektorit privat marr përshtypjen se ata nuk janë në humor për të shijuar ndonjë gjë”.
Një nervozitet i tillë i FMN-së me qeverinë mund të krahasohet vetëm me qëndrimet e saj në periudhën para rrëzimit të piramidave.
