Zëri i Amerikës ka qenë i drejpërdrejtë në lajmin e dhënë për vendimin e gjykatës me arrest shtëpie për Tahirin. VOA ka kujtuar se ishte Rama që e mbrojti Tahirin edhe kur mbolli vendin me drogë në vitin 2016. Kjo frazë ë Zërit të Amerikës është mjaft domethënëse pasi tregon se edhe media amerikane dhe jo vetëm media, e ka të qartë se pas Tahirit është Rama.
Lajmi në VOA
Në Shqipëri, Gjykata e Krimeve të Rënda vendosi sot pasdite masën e “Arrestit në shtëpi” për ish ministrin e Brendshëm Saimir Tahiri. Prokuroria nga ana e saj kishte kërkuar “Arrest me burg. Ajo e akuzon atë për kryerje të veprave penale “Trafikimi i narkotikëve”, në bashkëpunim, në formën e grupit të strukturuar kriminal dhe, “Korrupsioni pasiv i funksionarëve të lartë shtetërorë ose i të zgjedhurve vendorë”.
Kërkesa e Prokurorisë erdhi një javë pasi zoti Tahiri, dorëzoi mandatin e deputetit. Ish ministri ishte pranë banesës së tij me avokatin mbrojtës në kohën që në Gjykatë po merrej vendimi rreth kërkesës së prokurorisë. Ai u ngjit në banesë pak përpara se dy prokurorë të mbërrinin për t’i njoftuar atij vendimin e arrestit në shtëpi.
Ish ministri i Brendshëm u vu nën akuzë nëntorin e shkuar, për dyshimet se kishte lidhje me grupin e vëllezërve Habilaj, kushërinj të tij, të cilët ishin pjesë e një organizate italo-shqiptare e cila trafikonte marijuanë nga Shqipëria drejt Italisë.
Hetimet nisën pasi autoritetet italiane goditën këtë organizatë në Catania, ndërsa në përgjimet e kryera, emri i tij përmendet disa herë në bisedat mes trafikantëve.
Prokuroria kërkoi arrestimin e zotit Tahiri, por shumica e majtë, refuzoi kërkesën duke pretenduar se ajo nuk kishte paraqitur asnjë provë. Qëndrimi i shumicës dhe veçanërisht i kryeministrit Edi Rama, i cili i kishte dalë gjithmonë në krah, edhe kur gjatë vitit 2016 fenomeni i kultivimit të marijuahës mori një përhapje masive, u pa gjerësisht si një mbrojtje që ju ofrua ish ministrit. Opozita e ktheu këtë çështje në një kalë të betejës së saj politike, duke lëshuar akuza të forta ndaj tij.
Edhe vendimin e tij për të hequr dorë nga mandati i deputetit, ajo e konsideroi si “një manovër politike, pjesë e një pakti Tahiri-Rama për të mashtruar partnerët ndërkombëtarë”, ndërkohë që sipas opozitës, “Prokuroria është nën kontrollin e kryeministrit”.
Në reagimin e tij për vendimin e Gjykatës, kreu i Qeverisë, Edi Rama, shkruajti në Facebook se “vendimi i sotëm për Saimir Tahirin nuk komentohet, thjesht respektohet si një e drejtë e organeve të drejtësisë, të cilat i detyrohen vendit e botës një proces të pavarur, transparent e me integritet të plotë kushtetues e profesional, duke garantuar drejtësi jashtë çdo influence politike, mediatike a diplomatike”.
Për Monika Kryemadhin, drejtuesen e Lëvizjes Socialiste për Integrim “tashmë drejtësia vdiq plotësisht për t’ia lënë vendin përballjes së bandave dhe grupimeve në PS. Tashmë padrejtësia është përballë popullit , sepse drejtësia ka mbetur peng në duart e Edi Ramës dhe bandës së tij”, shkruajti zonja Kryemadhi në një postim në Facebook.
