Kampionati Botëror që do të nisë në Rusi më datë 14 qershor do të kushtojë plot 14.2 miliardë dollar dhe do të jetë njëherësh kompeticioni futbollistik më i kushtueshëm në histori. Këtë fakt e konfirmojnë rusët përmes “Rbk”, sipas të cilës, Rusia ka tejkaluar me shumë miliardë investimet zyrtare të parashikuara.
Raportohet se plani ishte që investimi total të arrinte në nivelin e 683 milionë rubla, ose 11 miliardë dollarë. “Rbk” përllogarit në fakt se vetëm infrastruktura e transportit për Botërorin ka kushtuar 6,11 miliardë dollarë, ndërsa ndërtimi i stadiumeve 3,45 miliardë dollar. 680 milionë dollar ka kushtuar ndërtimi dhe ogranizimi i strukturave pritëse.
Fituesit marrin plot 33 milionë euro nga FIFA
Kampionati Botëror i futbollit është kompeticioni që u siguron të ardhura të mëdha Federatave të skuadrave pjesëmarrëse, e ai i Rusisë nuk bën përjashtim. Tashmë është përcaktuar edhe shpërndarja e shpërblimeve për skuadrat pjesëmarrëse. Mësohet se skuadra triumfuese e Botërorit do të përfitojë 33 milionë euro, ndërsa ajo finaliste do të marrë 25 milionë euro.
Skuadra e vendit të tretë do të sigurojë 21 milionë euro, kurse ajo e vendit të katërt 19 milionë euro.
Ekipet që do të eliminohen në çerekfinale do të përfitojnë 15 milionë euro, kundrejt 11 milionëve të atyre të eliminuara në 1/8-at e finaleve.
Shpërblim do të jepet edhe për klubet që lejuan futbollistët të marrin pjesë në kompeticion, e shifra totale do të jetë prej 177 milionë eurosh. Gjithashtu, klubet do të marrin në formën e dëmshpërblimit edhe 113 milionë euro të tjera, në rast se futbollistët e tyre do të pësojnë dëmtime gjatë Kupës së Botës.
Në të njëjtën kohë, edhe vet federatat kanë përcaktuar shpërblimet për futbollistët e përfaqësueseve të tyre respektive.
Kështu, te Spanja, që është një prej pretendentëve, lojtarët do të përfitojnë 825 mijë euro secili. Shumë pranë saj është Brazili, me një shpërblim të akorduar prej 800 mijë eurosh për çdo lojtar. Shumë më e ulët është shifra e akorduar për Gjermaninë. Futbollistët e kësaj skuadre do të përfitojnë 350 mijë euro secili, nëse ia dalin mbanë që të mbrojnë titullin e fituar në vitin 2014.
