Jerome Boateng i pakënaqur nga paraqitja e skuadrës së tij. Mbrojtësi i Kombëtares Gjermane u shfaq kritik para kamareve për paraqitjen jo të mirë që bënë pancerat në takimin kundër Polonisë. 27-vjeçari i tërhoqi vëmendjen veçanërisht repartit të sulmit, ku në dy takimet e para të zhvilluara, atë ndaj Ukrainës dhe Polonisë, nuk ka arritur të japë më të mirën. “Personalisht nuk jam i kënaqur me barazimin kundër Polonisë. Skuadra nuk kishte shpejtësinë e duhur si dhe nuk arritëm të fitonim asnjë duel një për një. Sulmi gjithashtu nuk ishte në lartësinë e duhur, një fakt ky që duhet përmirësuar sa më shpejt të jetë e mundur”, tha ai.
Jerome vazhdon më tej, duke shtuar se ende skuadra nuk ka arritur ekuilibrat e duhur, por vuri theksin se nëse përqendrimi është maksimal nga ana e të gjithëve, atëherë Die Manschaft kanë shanse reale për të shkuar larg në “Euro 2016”.
