Ilir Meta ka treguar se sa herë i është nevojitur Edi Ramës, ai ka shkuar dhe i ka shërbyer Edi Ramës. Në vitin 2013 kur Edi Rama ishte i dëshpëruar dhe kërkonte të fitonte me çdo kusht e me çdo mjet, Ilir Meta shkoi në koalicion me të dhe i garantoi fitoren. U forcua në pushtetin e demokratëve, mori kryetarë komunash të PD, ish drejtorë dhe ish eksponentë të PD dhe i trafikoi ata tek Edi Rama. Pra Ilir Meta ua hipi shqiptarëve Edi Ramën mbi shpinë. Kur Edi Ramës i nevojiteshin 84 vota për Reformën Territoriale që nëpërmjet kësaj reforme ai ta ndërtonte arkitekturën e pushtetit të tij dhe të asgjësonte Partinë Demokratike në territor, Ilir Meta ja dha votat. Kur Edi Ramës i duheshin 6 ligjet e Reformës në Drejtësi pa konsensusin e PD, ishte Ilir Meta i cili përsëri ja dha votat e tij parlamentare. Siç mund ta shohim, për të gjitha çështjet e mëdha me rëndësi strategjike, Ilir Meta i ka shërbyer Edi Ramës. Ilir Meta është politikani i cili e ka forcuar më shumë se kushdo tjetër pushtetin e Edi Ramës. Në pranverë të vitit 2012, kur Edi Rama u pyet në Opinion për Ilir Metën, ai deklaroi se është sistemi që i korrupton njerëzit. Kjo ishte shenja se ai kishte marrëveshje të fshehtë me Ilir Metën dhe pas 1 viti, marrëveshja e fshehtë doli në sipërfaqe dhe u firmos publikisht në Shkodër. Sot Edi Rama njëlloj si në vitin 2012 i ka ndaluar akuzat për Ilir Metën. Nuk e sulmon më. A është kjo shenjë e një marrëveshjeje të fshehtë midis dy liderëve të së majtës shqiptare? Të mos harrojmë, si Rama e si Meta, janë politikanë të së majtës. E gjejnë bashkëpunimin midis tyre sepse sado që konfliktohen, kanë fije të fshehta e miq të përbashkët. Po ta analizojmë edhe në terren, shumë nga faktorët e Ilir Metës siç është rasti i Agron Çelës në Shkodër por edhe të tjerë të cilët publiku nuk i njeh, janë rreshtuar me Edi Ramën. A e ka dërguar Edi Rama Ilir Metën tek Opozita që ai të marrë votë opozitare dhe pastaj pasi ta marrë, ta çojë votën tek Edi Rama, siç ka vepruar gjithmonë?
