Dy persona të maskuar kanë grabitur me dhunë postën sekrete të prokurorisë së Durrësit. Ngjarja ka ndodhur gjatë paradites së sotme rreth orës 10:30, kur dy persona të armatosur dhe ende të paidentifikuar kanë grabitur postën sekrete.
Postieri me iniciale I.K. është ndaluar me forcë dhe është grabitur dy persona, teksa po shkonte të dorëzonte postën.
Kjo është një postë që shoqërohet nga persona të veçantë, të cilët janë përgjegjës për sigurinë e dokumenteve.
Në prokurorinë e Durrësit, gjendjen disa dosje për ish-zyrtarët e lartë të shtetit, të cilët janë nën hetim.
Reagon PD: Policia dhe Prokuroria të informojnë publikun mbi përmbajtjen e saj
Në një deklaratë për shtyp, deputeti i PD-së, Enkelejd Alibeaj, ka reaguar mbi grabitjen e postës sekrete të Prokurorisë nga dy persona të maskuar në Durrës.
Sipas Alibeaj, Policia e Shtetit duhet të informojë publikun se çfarë përmbajtje kishte posta sekrete dhe nëse kishte lidhje me kryetarin e Bashkisë së Durrësit, Vangjush Dakon.
“ Grabitja e postës sekrete për Prokurorinë e Durrësit është një nga shumë provat se marrja e drejtësisë nën kontrollin e Edi Ramës do të thotë se sot drejtësinë e kontrollon krimi i organizuar. Këtë e provon edhe nxitimi i Prokurorisë së Durrësit për të mohuar rëndësinë e materialeve të grabitura. Deklarat e Prokuroisë është qesharake, sepse grabitësit nuk ja koleksionues të letrave çfarëdo që i shkojnë prokurorisë. Dokumentat e grabitura kanë rëndësi për aktivitetin kriminal të atij që ka urdhëruar grabitjen e tyre. ”-u shpreh Alibeaj.
Deklarata e plotë
Grabitja e postës sekrete në Prokurorinë e Durrësit është një nga aktet më të rënda dhe të paprecedentë në të gjithë historinë e shtetit shqiptar.
Nuk ka ndodhur kurrë më parë, as në momentet më kritike të vendit, që të grabiten dokumenta sekretë as natën dhe as ditën.
Grabitja e materialeve sekrete për Prokurorinë e Durrësit është dështimi më i madh i rënies së shtetit përballë krimit.
Është dëshmia sesi shteti dhe krimi janë një i vetëm!
Bashkëpunimi i shtetit me krimin ka arritur në nivele të tilla, saqë krimi i organizuar di jo vetëm përmbajtjen e dokumentave sekrete, por krimi di vendin dhe orën kur ato do të tërhiqen nga korrieri i posaçëm i postës sekrete.
Partia Demokratike i kërkon Prokurores së Përgjithshme të Përkohshme dhe Policisë së Shtetit të informojë menjëherë publikun se cfarë përmbante posta sekrete, kush ishte në dijeni të dokumentave dhe cili ishte institucioni marrës dhe dërgues.
A ka lidhje posta sekrete e grabitur me hetime për Kryetarin e Bashkisë së Durrësit, Vangjush Dakon?
A ka lidhje posta sekrete e grabitur me hetimet për trafikun e drogës nëpërmjet Portit të Durrësit?
Grabitja e postës sekrete për Prokurorinë e Durrësit është një nga shumë provat se marrja e drejtësisë nën kontrollin e Edi Ramës do të thotë se sot drejtësinë e kontrollon krimi i organizuar.
Këtë e provon edhe nxitimi i Prokurorisë së Durrësit për të mohuar rëndësinë e materialeve të grabitura. Deklarat e Prokuroisë është qesharake, sepse grabitësit nuk ja koleksionues të letrave çfarëdo që i shkojnë prokurorisë. Dokumentat e grabitura kanë rëndësi për aktivitetin kriminal të atij që ka urdhëruar grabitjen e tyre.
Çdokush që ka besuar se prokuroria do të performonte ndryshe pas reformës në drejtësi, sot e provoi edhe një herë se gjithçka ishte një iluzion. E vërteta është se pa shkëputjen e lidhjeve të qeverisë nga krimi, situata në vend do të përkeqësohet.
