Tallja me jetën ka arritur kulmin në Shqipëri. Ndërkohë që Edi Rama shpall çdo ditë nga një kullë si qokë për ata që i kanë premtuar se do ta mbajnë në pushtet, Autoriteti Kombëtar i Ushqimit, e ka vendosur të njoftojë çdo ditë nga një lajm sa për t’ju kujtuar shqiptarëve se ushqimet që i blejnë sa frëngu pulën, nuk janë asgjë më shumë se ca vrasës që po i helmojnë në heshtje.
Vetëm 3 ditë pas lajmit të mishit të pulës me salmonelë i ardhur nga Brazili dhe i “zhdukur” në tregun vendas sa hap e mbyll sytë, një tjetër lajm “fantastiko-shkencor” është publikuar. Të paktën katër ngarkesa me luleshtrydhe të importuara nga Greqia në vendin tonë kanë rezultuar të kontaminuara me pesticide. Alarmin nuk e dha AKU, por RASFF, sistemi i alarmit të shpejtë për ushqimin i Komisionit Europian. Katër ngarkesat janë futur në treg, njëra më datë 17 shkurt, 2 ngarkesa në muajin mars dhe një më datë 1 prill. Të gjitha të pangrënshme për shkak te pesticideve kancerogjene. E vënë përballë faktit të kryer, AKU ka pranuar se ka kapur një ngarkesë, dhe analizat kanë treguar se alarmi i ardhur nga RASFF është i saktë, por ndërkohë, luleshtrydhet ishin shitur!!!
Histori “deja vu” dhe jo shumë larg, por vetëm 3 ditë më parë. 27 ton mish pule i kontaminuar hyri në Shqipëri, u analizua nga AKU, inspektorët e së cilës pasi i mbajtën përfundimet e analizave 1 javë në sirtar, dolën me përfundimin se mishi ishte shpërndarë ndërkohë. Ku? Në 157 biznese, restorante, kopshte, çerdhe e markete, që çuditërisht kompania nuk i deklaron cilat janë. E ndërkohë që gjithologët japin mend në debate televizive, mishi konsumohet dhe askush nuk e merr mundimin ta bllokojë.
Ah po, AKU dhe kompania “AMG Food” i ka thënë njerëzve, na e ktheni mbrapsht!
Të njëjtin fat patën edhe mandarinat që Evropa na i ktheu mbrapsht në dimër dhe i hëngrën shqiptarët etj., etj.
Çështja e Ushqimit ka qenë gjithmonë serioze në Shqipëri, por këto ngjarjet që kanë ndodhur me diferenca orësh, ngrenë dyshimin: Vërtet janë çmendur inspektorët e AKU sa të pranojnë krimet e tyre me njoftime zyrtare apo diçka fshihet nën këto ngjarje. Që ky institucion është një prej vrasësve të shqiptarëve, kjo dihet, dhe rastet që e vërtetojnë janë shumë. Por a mos ndoshta këto ditët e fundit AKU u vendos jo rastësisht në postin e zëdhënëses së vdekjes. Duke publikuar lajme të tilla, mos vallë qeveria shqiptare po mundohet të justifikojë një vendim që pritet të hyjë në fuqi me 13 maj dhe qe e shkrin përfundimisht AKU për ta zëvendësuar me atë që e kanë përkufizuar, si “strukturën përgjegjëse për inspektimin dhe kontrollin zyrtar të veterinarisë dhe mbrojtjes së bimëve”? Kjo struktura si puna e AKU-së do të jetë apo më keq?
Ndërsa qeveria po i rregullon vetullat strukturës së re, e ka nxjerrë AKU-në lakuriq në publik me shpresën që askush nuk do ti kërkojë llogari që, në vend që të forconte kontrollin ushqimor, e shkriu fare dhe po e zëvendëson me një “strukturë” që as ata që e kanë shpikur nuk e dinë çfarë është.
A thua e di kjo qeveri se në botën e qytetëruar institucionet e kontrollit të cilësisë së ushqimit janë me të fortat, më të financuarat dhe më të sigurtat? A e di kjo qeveri se nuk ka asnjë precedent në botës e qytetëruar që në njoftimin zyrtar të një institucioni të thuhet “mishi ishte i kontaminuar, por kur e kuptuam ne, ishte ngrenë i gjithi nga popullata”?
Në vendet e qytetëruara, për ngjarje të tilla bien ministra. Bien edhe qeveri!
