Kryetari i Shoqatës Antikomuniste të të Përndjekurve Politikë të Shqipërisë, Nebil Çika zhvilloi sot (e martë 29.08.2017) një takim pune me kryetarin e Partisë Demokratike, Lulzim Basha në zyrën e këtij të fundit në Tiranë. Biseda pati si temë kryesore zhvillimet më të fundit politike në vend veçanërisht përpjekjet për instalimin në pushtet e qeveri të ish-drejtuesve të lartë të diktaturës, pjesëtarë të Sigurimit famëkeq të Shtetit dhe pinjollëve politikë e biologjikë të xhelatëve të ish-shtetit komunist.
Në bisedë u ra dakord që kreu i PD-së, grupi i saj parlamentar, strukturat politike të mbështesin përpjekjet e të përndjekurve antikomunistë kundër rikthimit në edhe de jure në pushtet të ish-komunistëve.
Çika kërkoi nga Basha që PD-ja të theksonte orientimin e saj ideologjik antikomunist, gjë që duhet konkretizuar në aksion politik dhe program. Zoti Basha rikonfirmoi mbështetjen e tij dhe PD-së për të përndjekurit politikë të komunizmit, duke premtuar një vëmendje më të shtuar për problemet e tyre, duke riparuar gabime apo devijime të vëna re në të shkuarën.
Bashkëbiseduesit theksuan se të përndjekurit politikë të komunizmit janë pjesë thelbësore politike e elektorale e PD-së dhe kjo konkretizohet fakti që 12 deputetë të grupit të saj parlamentar dhe dhjetëra drejtues të tjerë të saj, qendrore e lokale, vijnë nga kjo shtresë.
Çika dhe Basha theksuan rëndësinë e bashkëpunimit më të ngushte midis Shoqatës Antikomuniste dhe PD-së, një marrëdhënie që do të jetë më e konsoliduar dhe më e konkretizuar në vazhdim.
Dje Shoqata Antikomuniste e të Përndjekurve Politikë të Shqipërisë nëpërmjet një Promemorie i kërkoi Kreut të Shtetit, krerëve të partive politike parlamentare dhe Trupit Diplomatik të reagojnë për të penguar zgjedhjen e ish-ministrit të Brendshëm të diktaturës komuniste Gramoz Ruçi në krye të Kuvendit. Reagimi i parë, siç pritej erdhi nga kreu i PD-së Basha që u konkretizua me takimin e sotëm të vlerësuar nga palët si “shumë të rëndësishëm”.
