Ish-deputeti dhe ish-ministri socialist, Arben Malaj, përmes një postimi në rrjetet sociale ka shpërthyer në akuza ndaj Rilindjes.
Kjo nuk është hera e parë që Malaj shpreh kritika të forta në drejtim të Rilindjes, çka çoi mazhorancën e majtë në Kuvend që të miratonte shkarkimin e tij nga Këshilli Mbikqyrës i Bankës së Shqipërisë.
Në postimin e tij, Malaj ndalet te dekriminalizimi i politikës, ndërsa akuzon Rilindjen se kriminalizoi Kuvendin dhe Bashkitë për pushtet absolut.
“Një institucion shtet-formues, që fatkeqësisht njollën më të zezë në historinë e tij të tranzicionit ka vet-kriminalizimin. Një grusht “Rilindës” të paditur, të pa ngopur dhe arrogantë, e përdoren me vetë-dije kriminalizimin e Kuvendit dhe të shumë bashkive për pushtet personal absolut, duke rrënuar kredibilitetin institucional dhe publik të politikës në tërësi dhe të Kuvendit në veçanti për pushtet dhe pasurim kriminal në kurriz të shqiptarëve”, shkruan Malaj në postimin e tij.
