Detaje të reja dalin nga arrestimi i Altin Morinës, i cili u vendos në pranga mbrëmjen e së enjtes në Tiranë nga efektivët e Komisariatit nr. 2.
Raportohet se ish-efektivit të RENEA-s iu gjet armë dhe dokumente false me vete.
Në momentin e vendosjes në pranga, Altin Morina raportohet se ishte nën shoqërinë e një personi tjetër.
Ish-efektivi i RENEA-s, i cili ishte shpallur në kërkim me urdhër të SPAK që nga data 17 Maj 2024, akuzohet nga Prokuroria e Posaçme si bashkëpunëtor i Durim Bamit në kultivimin e kanabisit në zonën e Niklës dhe Tapizës.
“Në dinamikën e hetimit të këtij procedimi penal, janë grumbulluar prova që krijojnë dyshimin e arsyeshëm se shtetasi Durim Bami, në bashkëpunim me shtetasin Altin Morina (me detyrë efektiv i forcave “Renea” në kohën e kryerjes së krimit) kanë organizuar kultivimin e bimëve narkotike në zonën e Niklës dhe Tapizës”, thuhet në dosjen e SPAK.
Kujtojmë që Altin Morina u arrestua edhe më 14 mars 2023 në zonën e Komunës së Parisit pasi u kap duke qarkulluar me një automjet tip Audi Q8 me 113 mijë euro një shumë paundësh dhe lekësh me vete.
Por, me vendim të gjykatës ish-efektivin e forcave RENEA, u la i lirë në muajin prill të atij viti.
Pas arresimit ai kishte deklaruar se shumat e parave i kishte marrë tek një biznesmen për një hall personal. Ndërkohë në atë kohë mor në pyetje edhe biznesmeni që Morina pretendoi se i dha lekët dhe ai ka pranuar që i ka dhënë paratë.
“Nuk ka prova, këto para i kam marrë nga një biznesmen 30 minuta para arrestimit. Nuk vijnë nga produkt kriminal, jam gati të bashkëpunoj me organin e akuzës për t’i dhënë prova që kanë të bëjnë me arsye personale dhe familjare. Nuk ka patur person tjetër në shoqërinë time në momentin e arrestimit. Po shkoja në shtëpi, te Komuna e Parisit, dhe isha drejtuar në “Ish-Bllok” ku banoj”, tregoi ish-efektivi.
