Kryeprokurorrja e Përkohshme, Arta Marku ka emëruar bashkëshortin e saj, Erin Çaku në pozicionin e oficerit të Policisë Gjyqësore (Opgj) në Prokurorinë e Durrësit.
Erin Çaku, i cili prej disa vitesh ushtronte detyrën e OPGJ-së në Prokurorinë e Lezhës është transferuar, me firmën e bashkëshortes së tij, Arta Marku, në prokurorinë e qytetit bregdetar.
Burime nga prokuroria e Durrësit bënë të ditur se, transferimi i Çakut nga Lezha në Durrës është realizuar në Korrik të këtij viti. Të njëjtat burime thonë, gjithashtu, se oficeri më i ri i policisë gjyqësore është paraqitur në zyrën e tij të re, në Prokurorinë e Durrësit, vetëm në fillim të Shtatorit 2019, pra pas gati dy muajsh “pushime”.
Transferimi, natyrisht, është kryer pas kërkesës së mikeshës së Arta Markut, drejtueses së Prokurorisë së Durrësit, Anita Jella, për shtim të organikës së oficerëve të Policisë Gjyqësore, si pasojë e ngarkesës së punës.
Dhe, Arta Marku, mesa duket për të dëshmuar se është e vendosur të forcojë cilësinë e hetimit në qytetin bregdetar, i ka dhënë Prokurorisë së Durrësit njeriun e saj më të besuar, bashkëshortin e saj.
Ky vendim skandaloz i Arta Markut përbën një rast flagrant të konfliktit të interesit.
Kryeprokurorja e Përkohshme, banore e Shkodrës dhe që aktualisht jeton në Tiranë, falë një bonusi special qeraje nga Këshilli i Ministrave, duket se është lodhur nga vonesat e bashkëshortit të saj, i cili duhet të shkonte nga Tirana për në Lezhë dhe anasjelltas.
Pasi ka “sakrifikuar” disa kohë për të mirën e Shtetit, më në fund ka vendosur t’i bëj edhe këtë nder vetes- të afrojë bashkëshortin sa më pranë Tiranës.
Për të realizuar planin, nuk i mungonte asgjë. Nxit Anita Jellën e Durrësit që të bëj kërkesë për shtim stafi të oficerëve të Policisë Gjyqësore dhe zgjidhja ishte e menjëhershme- firmoset urdhëri i transferimit për bashkëshortin, Erin Çaku.
Në një mori emrash oficerësh policie gjyqësore, me nevoja shumë më të mëdha familjare për të qenë sa më pranë Tiranës, gishti i Arta Markut zgjodhi bashkëshortin e saj për ta transferuar nga Lezha në drejtim të Durrësit.
Duke e shndërruar Prokurorinë e Përgjithshme në një strukturë miqsh e mikeshash dhe, së fundmi edhe familjare, Arta Marku ka vepruar me shpejtësi dhe i ka propozuar emrin e bashkëshortit të saj për transferimin drejt Durrësit, një Komisioni, të ngritur me njerëz të caktuar prej saj, në zbatim të ligjit të ri “Për Policinë Gjyqësore”.
Ky ligj, i cili ka hyrë në fuqi në Qershor 2019, parashikon ngritjen e një Komisioni për emërimet, transferimet dhe komandimet e oficerëve të Policisë Gjyqësore, në bazë të propozimit të Prokurorit të Përgjithshëm.
Komisioni përbëhet nga 5 anëtarë, nën drejtimin e një prokurori të Prokurorisë së Përgjithshme dhe anëtarët e tjerë janë oficerë të Policisë Gjyqësore të Prokurorisë, të gjithë të caktuar nga Prokurori i Përgjithshëm, si dhe të opgj të caktuar nga Drejtoria e Përgjithshme e Policisë.
Ky komision, i përbërë në shumicë nga zyrtarë të caktuar nga Arta Marku, i ka pranuar propozimin e saj për të transferuar bashkëshortin e saj tyrë nga Lezha, duke e afruar në Durrës, shumë pranë familjes, një “fat” që nuk e kanë shumë kolegë të oficerit të Policisë Gjyqësore, Erin Çaku.
