Bekim Balaj sërish në formacionin më të mirë të javës në Premier Leaguen ruse. Për herë të tretë rresht, sulmuesi shqiptar është përzgjedhur në 11-shen më të mirë, tregues ky i formës së shkëlqyer që po kalon bomberi shkodran. Në javën e 13-të të kampionatit rus, Balaj me një dygolësh i dha fitoren me shifrat 2-1 Terek Grozny-it ndaj Zenitit të Shën Petersburgut, duke i shkaktuar humbjen e parë sezonale skuadrës së Mircea Lucescut.
Balaj është padiskutim njeriu i momentit në Premier League ruse, pasi në 3 javët e fundit të kampionatit ka arritur ta gjejë në 5 raste rrugën e rrjetës. Aktualisht, bomberi shkodran kryeson listën e golashënuesve në Rusi me 8 finalizime aq sa edhe sulmuesi i Krasnodarit Fedor Smolov. Terek Grozny është ngjitur në vendin e 3-të dhe për këtë një meritë të jashtëzakonshme e ka pikërisht 25-vjeçari nga Shkodra. Në sfidën ndaj Zenitit, Balaj me dy golat e tij përmbysi avantazhin provizor të skuadrës nga Shën Petersburgu. Tashmë objektivi i Bekim Balajt është të realizojë për Shqipërinë në sfidën kualifikuese të Botërorit Rusi ndaj Izraelit.
