Merkatoja e verës parashikohet të jetë shumë e rëndësishme për Barcelonën që ka si synim kryesor të përforcojë skuadrën me të tjerë elementë cilësorë. Por ndryshe nga vitet e kaluara situata këtë herë në klubin katalanas nuk premton shumë. Duke iu referuar asaj se çfarë shkruajnë mediat spanjolle, Barcelona aktualisht ka në dispozicion vetëm 25 milionë euro për të shpenzuar në merkaton e verës. Arkat e Barçës janë boshatisur. Në fakt blaugranat kishin një buxhet prej 60 milionë eurosh për merkaton e vitit 2017-të, por firma me portugezin Andre Gomes verën e kaluar për të cilin, drejtuesit e Barcelonës pritet të derdhin në arkat e Valencias shumën e 35 milionë eurove gjatë kësaj vere, kanë reduktuar ndjeshëm buxhetin e klubit bluagrana për merkaton.
Investimet e shumta gjatë këtyre viteve kanë ndikuar jo pak, pasi tashmë Barcelona duhet të mendohet mirë përpara se të ndërhyjë në merkato. Për të afruar të tjerë futbollistë cilësorë në skuadër gjatë kësaj vere klubi katalanas më herët duhet të shesë. I pari në listë për t’u larguar është mesfushori turk Arda Turan, largimi i të cilit do të sillte të ardhura të tjera që mund t’u shtoheshin 25 milionë eurove për buxhetin e merkatos së verës. Objektivat kryesorë të Barçës janë një mesfushor qëndre, me Marco Verratin që qëndron në krye të listës, por edhe një mbrojtës i krahut të djathtë, por të blerë dy lojtarë të nivelit të lartë në këto dy role, shitja e Arda Turan nuk mjafton me Barçën që duhet të sakrifikojë të tjerë futbollistë nga grupi aktual.
